Ársæll Guðmundsson, skólameistari Borgarholtsskóla, verður ekki endurskipaður skólameistari á næsta ári þegar núverandi skipunartími hans rennur út. Ársæll greinir frá þessu í tölvupósti til starfsmanna en DV greindi fyrst frá.
Kennir skólameistari Flokki fólksins um starfslok sín og vísar í „skómálið“ svokallaða en þá hringdi Inga Sæland, félags- og húsnæðismálaráðherra, í Ársæl vegna skópars sem barnabarn hennar týndi.
Samkvæmt heimildum Vísis minnti Inga skólameistarann á að hún hefði tengsl inn í lögregluna. Ársæli mun hafa blöskrað símtalið svo mikið að hann ræddi það við marga starfsmenn skólans.
Inga baðst síðar afsökunar á símtalinu en neitaði hún því að hafa minnst á lögregluna í símtalinu.
Mögulega spillt ráðning
Ársæll Guðmundsson komst í fréttirnar fyrir tæpum áratug þegar hann var ráðinn skólameistari Borgarholtsskóla en ráðning hans var mjög umdeild á sínum tíma. Ragnar Þór Pétursson, sem þá var fulltrúi menntamálaráðherra í skólanefnd Borgarholtsskóla, sagði ráðningu Ársæls lykta af spillingu en hann hafði starfað sem verkefnastjóri í mennta- og menningarmálaráðuneytinu sem var undir stjórn Illuga Gunnarssonar áður en hann var ráðinn í stöðu skólameistara.
Samkvæmt Ragnari voru allir nefndarmenn sammála um að einn umsækjandi um stöðuna væri hæfastur en það hafi ekki verið Ársæll.
„Þvert á móti voru fleiri en einn umsækjandi að mínu mati augljóslega frambærilegri. Ég held að Ársæll Guðmundsson hafi verið ráðinn af pólitískum ástæðum. Ég treysti ekki því ferli sem fram fór,“ skrifaði Ragnar Þór. „Ég held að málið allt angi af spillingu.“
Tölvupóstur Ársæls
Kæra samstarfsfólk
Það er með miklum trega og með sorg í hjarta að ég skrifa ykkur þennan tölvupóst til að upplýsa ykkur um að Guðmundur Ingi Kristinsson, mennta- og barnamálaráðherra hefur látið birta mér að hann óski ekki eftir kröftum mínum sem skólameistara. Þvert á allar hefðir og í ljósi þess að undanfarið hefur ráðherra endurskipað aðra skólameistara og nýlega ráðið í lausar stöður er augljóst hvað liggur að baki ákvörðun Guðmundar Inga og Flokks fólksins. Ég hef aldrei verið áminntur í starfi eða fengið ákúrur frá ráðherra menntamála þá áratugi sem ég hef starfað sem skólameistari og ætíð haldið rekstri skólans innan fjárlagaheimilda.
Skipunartími minn rennur út um mitt næsta ár eða tveimur árum áður en ég kemst á eftirlaunaaldur og eru þá rétt 40 ár síðan ég brautskráðist sem kennari úr Kennaraháskóla Íslands. Ævistarfi mínu finnst mér lítill sómi sýndur og þakklætið rýrt en ráðherra afhenti mér ekki sjálfur tilkynninguna heldur fékk starfsfólk sitt til að sjá um það. Skýring þeirra á þessari ákvörðun ráðherra er sú að ráðherra hefði heimild til að gera þetta.
Ég er nú í þeirri skrýtnu stöðu að vera forstöðumaður fyrir ríkisstofnun þar sem ráðherra hefur í raun lýst yfir vantrausti á störf mín og ég því nánast umboðslaus.
Sjálfur hefði ég kosið að starfa áfram við skólann við að efla okkar góða starf og styrkja enda margar áskoranir framundan. Vinnustaðurinn okkar er frábær, starfsandinn góður og fagmennska í fyrirrúmi. Þykir mér afar leitt að vera hent frá borði með þessum hætti. Á allri minni ævi hef ég ekki kynnst betri vinnustað en nú skilja leiðir.
Bestu kveðjur
Ársæll
Komment