Fjölskylda týnda Pittsburgh-háskólanemans, Sudiksha Konanki, óttast að henni gæti hafa verið rænt í Dóminíska lýðveldinu.
Sjá einnig: Tvítugur nemi í vorfríi hvarf sporlaust – Sást síðast á ströndinni
Yfirvöld á staðnum hafa gefið til kynna að hinn tvítugi læknanemi hafi líklega drukknað eftir að hafa hoppað í sjóinn snemma á fimmtudagsmorgun þegar Konanki var í vorfríi með vinum sínum á Riu Republic Resort í Punta Cana.
Fjölskylda hennar efast hins vegar um þá útskýringu. „Það eru liðnir fjórir dagar og ef hún væri í sjónum hefði henni líklega skolað á land,“ sagði faðir týnda nemandans, Subbarayudu Konanki, við wtop.com. Bætti hann við: „Hún finnst ekki, svo við biðjum þá um að kanna aðra möguleika, eins og mannrán eða brottnám.“
Pabbinn flaug frá heimili sínu í Virginíu til Punta Cana með eiginkonu sinni og tveimur fjölskylduvinum um leið og hann áttaði sig á dóttur hans var saknað.
Þau lögðu fram sakamálakæru þar sem þau þrýstu á Dóminíska yfirvöld að „gera tafarlausar ráðstafanir til að kanna ekki aðeins möguleikann á drukknun fyrir slysni, heldur einnig möguleikann á mannráni eða glæpsamlegum verknaði,“
„Eigur hennar, þar á meðal persónulegir hlutir eins og síminn hennar og veski, voru skildir eftir hjá vinum hennar, sem er óvenjulegt því hún var alltaf með símann sinn með sér,“ sagði í kærunni.
Sudiksha, nokkrir vinir og „nokkrir aðrir strákar sem þau hittu á dvalarstaðnum“ fóru á ströndina um 4:00 eftir að hún sagði vinum sínum að hún væri á leið í partý, sagði faðir hennar við CNN. „Eftir það komu vinir hennar aftur eftir nokkurn tíma og dóttir mín kom ekki aftur, kom ekki af ströndinni,“ sagði faðir hennar.
Konanki og fleiri sáust á eftirlitsmyndum nálægt ströndinni skömmu áður en hún hvarf.
Embættismenn á dvalarstaðnum sögðu að vinir hennar hafi tilkynnt hvarf hennar um klukkan 16:00. á fimmtudag, um 12 tímum eftir að hún sást síðast, þegar hún fannst ekki í herberginu sínu.
„Þeir leituðu með þyrlum og eftir öðrum leiðum. Þeir leituðu einnig í nærliggjandi flóa, runnum og trjám. Þeir fóru margsinnis um sömu svæðin,“ sagði þjáður faðir hennar við CNN.
Stofnanir frá heimili Konanki í Virginíu, ásamt indverska sendiráðinu í Dóminíska lýðveldinu, hafa aðstoðað við leitina en Konanki er indverskur ríkisborgari.
Alríkislögreglan, DEA, Rannsóknarmenn Heimavarnar (e. Homeland Security Investigations) og lögreglan í Pittsburgh-háskóla aðstoða við rannsókn dóminísku ríkislögreglunnar, að sögn lögreglustjórans í Loudoun-sýslu, Virginia, þaðan sem Konanki er.
Þá hefur Pittsburgh-háskólinn verið í sambandi við fjölskyldu hennar.
Konanki var á dvalarstaðnum með fimm öðrum kvenkyns námsmönnum frá Pittsburgh-háskóla, að sögn lögreglustjórans í Loudoun-sýslu.