Austfirska hljómsveitin Shape hefur sent frá sér lagið Tar & Feather, sitt fyrsta nýja efni í 24 ár. Bassaleikarinn Logi Helgu segir sveitina hafa meira fram að færa og stefnir hún nú á að gefa út nýja plötu.
Það er orðið langt síðan síðast heyrðist nýtt efni frá austfirsku hljómsveitinni Shape, sem á tíunda áratugnum tryllti lýðinn fyrir austan á skólaböllum grunn- og framhaldsskólum, en nú hefur sveitin snúið aftur með lagið Tar & Feather. Síðast sendi hún frá sér efni á safnplötunni Drengurmaður árið 2002.
„Lagið Tar & Feather er fyrsta lagið sem kemur út frá okkur í 24 ár og er að hluta til vísun í heimsbókmenntir æsku okkar, það er að segja Lukku Láka og hvernig menn eru tjargaðir og fiðraðir fyrir syndir sínar,“ segir Logi Helguson, bassaleikari sveitarinnar í samtali við Mannlíf.
Lagið fjallar um baráttuna við syndirnar, sem fólk ýmist brennur fyrir innra með sér eða þarf að gjalda fyrir á opinberum vettvangi, líkt og í sögunum um Lukku Láka.
Upptökurnar tóku næstum 13 ár
Þótt 24 ár séu liðin frá síðustu útgáfu Shape hefur lagið Tar & Feather átt sér langan aðdraganda. Upptökuferlið tók tæp 13 ár og fyrstu trommuupptökurnar fóru fram í Reflex Studios í desember 2013. Hljóðverið hefur nú verið lagt niður.
Lagið er samið af meðlimum Shape. Prins Grímsson sá um upptökustjórn og hljóðblöndun en Axel Flex Árnason annaðist hljóðjöfnun. Auk núverandi meðlima sveitarinnar komu Bragi Hreinn Þorsteinsson, fyrrverandi meðlimur, og Axel Flex að upptökunum með tamborínum og kúabjöllu.
Stofnuð á Eiðum árið 1994
Shape var stofnuð í Alþýðuskólanum á Eiðum árið 1994 og var áberandi í tónlistarlífi Austurlands fram til ársins 1999. Sveitin komst meðal annars í úrslit Músíktilrauna árið 1996.
Á ferlinum gaf Shape út tvær stuttskífur, Limited Edition árið 1998 og Lost EP árið 2002. Sú fyrrnefnda var hljóðrituð í Studio RIS í Neskaupstað undir stjórn Jóns Hilmars Kárasonar en sú síðarnefnda í Studio Steinholti á Seyðisfirði og Hljóðrita í Hafnarfirði. Þá birtist tónlist sveitarinnar á nokkrum austfirskum safnplötum.
Sveitin hefur alla tíð verið skipuð Austfirðingum. Núverandi meðlimir eru Magni Ásgeirsson, söngur og gítar, Hafþór Snjólfur Helgason, trommur og bakraddir, Prins Grímsson, gítar og bakraddir, Logi Helguson, bassi og bakraddir, og Sigursteinn Þór Einarsson, betur þekktur sem Diddi, sem syngur bakraddir.
Stefnan sett á næstu plötu
Shape lætur ekki staðar numið við endurkomulagið. Sveitin vinnur nú að frekara efni sem stefnt er að því að gefa út á næstu mánuðum.
„Við erum sennilega eitt af þessum böndum sem trúa því að þau eigi eitthvað eftir ósagt. Nú er stefnan bara sett á næstu plötu,“ segir Logi.
Áður en kemur að plötugerðinni bíður sveitarinnar þó tónleikahald. Shape stígur á svið á Eyrarrokki á Akureyri um helgina, þar sem meðal annarra koma fram Dr. Spokk, Dr. Gunni, Kolrassa Krókríðandi og Innvortis.
„En fyrst er það Eyrarrokk um helgina á Akureyri, djöfull verður það gaman!“ segir Logi að lokum.
Athugasemdir