Það var sannarlega óvenjulegur leikur sem leikinn var á Laugardalsvelli fyrr í kvöld þegar íslenska karlalandsliðið mætti Úkraínu í undankeppni HM í fótbolta.

Úkraína komst yfir strax á 14. mínútu en það íslenska náði að jafna leikinn á þeirri 34. Úkraínumenn náðu hins vegar að skora tvö mörk alveg undir lok fyrri hálfleiks og var Ísland því undir 1-3 í hálfleik en öll mörk gestanna komu eftir einstaklingsmistök leikmanna Íslands.

Í síðari hálfleik var Ísland mun betri en Úkraína mestallan tímann og skoraði Albert Guðmundsson mark á 59. mínútu og jafnaði svo leikinn á 75. mínútu. Allt virtist stefna í að Ísland myndi bæta við fjórða markinu en þess í stað skoraði Úkraína á 85. mínútu og 88. mínútu.

Niðurstaðan því svekkjandi tap sem skrifast að miklu leyti á einstaklingsmistök í varnarleik Íslands.