Arne Slot brá ekki út af vananum eftir tap Liverpool gegn Manchester United á sunnudag. Hollenski þjálfarinn hélt áfram að sýna þá yfirveguðu ró sem stuðningsmenn liðsins eru orðnir vanir að sjá hjá honum.

Þrátt fyrir að hafa stýrt liðinu í fjórða tapleiknum í röð, verstu úrslitarunu félagsins frá árinu 2014, var Slot áfram rólegur og afslappaður í búningsklefanum eftir leikinn, samkvæmt Daily Mail. Þetta er í fyrsta sinn í heilt ár sem Liverpool tapar deildarleik á Anfield.

Slot, sem á fyrsta tímabili sínu hefur ekki verið vanur að tapa leikjum, hefur nú séð liðið missa toppsætið eftir þrjú töp í röð í ensku úrvalsdeildinni og eitt í Meistaradeildinni.

Í stað þess að reiðast eða gagnrýna leikmennina hélt hann áfram að sýna jafnaðargeð og fagmennsku. Hann er þó vel meðvitaður um þá pressu sem fylgir því að snúa taflinu við, sérstaklega eftir miklar fjárfestingar félagsins síðasta sumar.

Þrátt fyrir álagið er ekki talið að starf hans sé í hættu. Fyrrverandi þjálfari Feyenoord stendur nú frammi fyrir stærsta verkefni sínu hjá Liverpool hingað til, en heldur fast í þau vinnubrögð sem hafa skilað honum árangri hingað til.

Slot hefur áður nefnt að hann hafi tekið sér innblástur af Lance Armstrong. Bandaríski hjólreiðamaðurinn var þekktur fyrir að bregðast við mótlæti með því að brosa, og gefa svo í þegar á hólminn var komið. Slot hélt áfram að brosa eftir tapið á sunnudag, í sama anda.

Þegar hann nýtti sér landsleikjahléið til að ferðast til Dubai, var hann sagður verja meirihluta ferðarinnar í að greina vandamál liðsins og skoða leikmyndbönd á fartölvunni sinni, í von um að stöðva fallið.

Slot les hollenska dagblaðið De Telegraaf á morgnana og hlustar á talkSPORT á leið sinni til vinnu, en lætur almennt ekki neikvæða umfjöllun hafa áhrif á sig, þó hann sé greinilega meðvitaður um umræðuna í kringum sig og liðið.

Hann hefur kosið að búa fyrir utan borgina Liverpool, aðallega til að hafa friðsælla líf utan sviðsljóssins og fjölmiðlaálagsins. Hann segir að áskoranir hafi fylgt honum frá fyrsta degi í starfi, fyrst að vinna leiki, síðan að lifa við samanburð við Jürgen Klopp, og nú að brjóta þessa taphrinu.

Slot sagði:

„Ég held að sem knattspyrnustjóri standi maður stöðugt frammi fyrir áskorunum. Þegar ég byrjaði fyrst var áskorunin að vera nýr þjálfari og þurfa að vinna leiki. Svo, þegar þér gengur vel, ferð þú til stærra félags og fólk segir: „Jæja, sjáum hvernig honum gengur þar.“ Þá ferð þú að verða eftirmaður Jürgen Klopp og fólk segir að það sé stærsta áskorun þín hingað til. Nú höfum við tapað fjórum sinnum í röð og það er líka áskorun. Líf knattspyrnustjóra er stöðug áskorun. Ef þú vinnur leiki viltu halda áfram að vinna, ef þú tapar leikjum viltu byrja að vinna aftur.“