Litháískur ríkisborgari var í Héraðsdómi Reykjaness í fyrrdag dæmdur í þriggja ára og sex mánaða fangelsi fyrir stórfellt fíkniefnalagabrot, eftir að hafa flutt kókaín í vökvaformi til landsins í ágóðaskyni.

Maðurinn, Sarunas Juozaponis, játaði sök við þingfestingu málsins og var málið því dómtekið án frekari sönnunarfærslu. Brotið átti sér stað laugardaginn 22. nóvember 2025, þegar ákærði kom til landsins með flugi frá Lettlandi til Keflavíkurflugvallar. Í farangri hans fundust 3.000 millilítrar af kókaíni í vökvaformi, með styrkleika á bilinu 55–57 prósent, falið í fjórum flöskum.

Samkvæmt dómnum voru fíkniefnin ætluð til söludreifingar hér á landi í ágóðaskyni. Ákærði samþykkti einnig upptöku á efnunum og gekkst greiðlega við hlut sínum í innflutningnum. Málið var því rekið samkvæmt ákvæðum laga um meðferð sakamála um játningarmál.

Við ákvörðun refsingar lagði dómurinn meðal annars til grundvallar að ákærði hefði ekki áður gerst sekur um refsiverða háttsemi, og að ekkert benti til þess að hann hefði verið eigandi fíkniefnanna eða komið að skipulagningu innflutningsins umfram það að samþykkja að flytja efnin gegn greiðslu. Þá var tekið tillit til greiðrar játningar hans fyrir dómi.

Á hinn bóginn þótti ekki unnt að líta fram hjá alvarleika brotsins, þar sem um var að ræða innflutning á kókaíni í vökvaformi til söludreifingar. Með vísan til dómafordæma Hæstaréttar, Landsréttar og Héraðsdóms þótti fangelsisrefsing í þrjú ár og sex mánuði hæfileg.

Til frádráttar refsingu kemur gæsluvarðhald sem ákærði hefur sætt frá 23. nóvember 2025, að fullri dagatölu.

Dómurinn fól jafnframt í sér upptöku á haldlögðum fíkniefnum og var ákærði dæmdur til að greiða alls 1.566.663 krónur í sakarkostnað, þar af 1.171.704 krónur í þóknun skipaðs verjanda, Kristínar Evu Geirsdóttur, að meðtöldum virðisaukaskatti, auk aksturskostnaðar.

Dóminn kvað upp Jón Stefán Björnsson, aðstoðarmaður dómara.