Dagur B. Eggertsson átti ansi hreint óvenjulegt kvöld í gær en þá steig hann á svið sem leikari í Háskólabíói, eitthvað sem honum datt ekki í hug að myndi gerast þegar hann vaknaði í gærmorgun.

Fyrrverandi borgarstjóri Reykjavíkur og núverandi þingmaður Samfylkingarinnar skrifaði skemmtilega Facebook-færslu í morgun þar sem hann segir frá afar einstöku kvöldi sem hann átti í gær. Barst honum óvænt símtal frá engum öðrum en Króla sjálfum sem vantaði gestaleikara á svið Háskólabíós og það strax um kvöldið. Um var að ræða nýjan íslenskan gamanleik, Ber er hver, sem Sviðslistahúsið Afturámóti sýnir í Háskólabíói þessa dagana. Dagur skrifaði:

„Sumir dagar eru undarlegri og betri en aðrir. Eftir að hafa verið óvenju eirðarlaus fram eftir degi í gær fékk ég óvænt símtal seinni partinn. Það var @kiddioli betur þekktur sem Króli sem var ögn trekktur á línunni og vantaði sem sagt gestaleikara í frumsamda leiksýningu í Háskólabíó þá um kvöldið.“

Dagur ákvað að grípa gæsina og slá til:

„Eftir stutta umhugsun sló ég til. Mætti hálftíma fyrir sýninguna og fékk þá textann fyrir senuna - upp á þrjár síður - í sms. Tvö rennsli og svo hófst sýningin! Fullt hús af áhorfendum og rífandi stemmning. Þetta var líklega akkúrat adrenalínið sem ég þurfti eftir spennufall vikunnar. Lukkaðist furðanlega og ótrúlega gaman að taka þátt.“

Þingmaðurinn hárprúði fékk að lokum afhent kefli frá fyrri gestaleikara sýningarinnar:

„Eftir uppklapp fékk ég svo sérstaklega afhent keflið eða öllu heldur byssuna - af fyrri gestaleikara - Boga Ágústssyni. Magnað alveg. Mæli með Ber er hver að baki og þakka fyrir mig!“