Einn ástsælasti tónlistarmaður Íslandssögunnar, Magnús Eiríksson, lést í gær, áttræður að aldri. Fjölmargir hafa minnst Magnúsar á Facebook en hér má sjá falleg minningarorð nokkurra þekktra einstaklinga.
Söng- og baráttukonan Margrét Kristín Blöndal eða Magga Stína, þakkar Magnúsi fyrir hans frábæru tónlist:
„Far vel Magnús Eiríksson.
Takk fyrir þitt stórkostlega tónlistarverk.
Takk fyrir að deila með okkur þínum yndislegu melódíum og frábæru textum, oft svo hárbeittum en alltaf yfirfullum af mennsku, kærleika og húmor.
Takk.“
Fjölmiðlamaðurinn víðlesni, Egill Helgason skrifaði einnig fallega um Mannakornskonunginn og lét fylgja hlekk á lag Magnúsar, Gleði og friðarjól.
„Það er svo margt fallegt og gott hægt að segja um Magga Eiríks - og ég veit að það verður gert næstu daga. Ég ætla að láta mér nægja að segja hvað ég er þakklátur honum um hver jól fyrir að hafa samið fallegasta og innilegasta jólalag seinni tíma á Íslandi. Jú jólin er nýliðin, en þetta gleður mig í desember hvert ár. Og ekki spillir frábær söngur Pálma félaga hans í tónlistinni til margra áratuga.“
Fellbæska tónskáldið Þórunn Gréta Sigurðardóttir kallar Magnús „andans risa“ í færslu á Facebook og sagði hann hafa verið „einstakt ljúfmenni“.
„Annar andans risi innan íslenska listalífsins fallinn frá á óhugnanlega stuttum tíma. Ég þekkti Magnús ekki mikið en var fastagestur í Rín lengi vel. Einstakt ljúfmenni og spjallaði og sýndi fram og til baka þótt hann vissi örugglega sem var að það væri ekkert svakalega mikill peningur í þessum tvítugu hippavösum. Lögin hans og textarnir eru svo náttúrulega bara samofin æðakerfinu í okkur öllum. Takk fyrir allt. Farvel.“
Leikkonan Steinunn Ólína Þorsteinsdóttir skrifaði einnig afar fallega færslu um Magnús.
„Magnús Eiríksson allur. Hvíl í friði örláti meistari. Þú skrifaðir um Ómissandi menn en fangaðir okkur með tónlist þinni og textum. Fjölskyldu Magga sendi ég mínar samúðarkveðjur og mig langar ekkert meira en að syngja lagið Samferða, helst alla helgina, hástöfum, svo það megi vera áminning til sjálfrar mín um að enginn gengur einn og öll erum við samferða.“
Þá minnist tónlistarmaðurinn Jón Ólafsson einnig á Magnús og sendir þjóðinni djúpar samúðarkveðjur.
„Hlusta nú á Magnús Eiríksson syngja Ómissandi fólk.
Hann er farinn frá okkur; okkar albesti laga- og textahöfundur. Harmafregn. Ég sendi vinum hans og fjölskyldu dýpstu samúðarkveðjur - já og þjóðinni allri.“
