Einar Steingrímsson stærðfræðingur og samfélagsrýnir spyr hvort lögreglan á höfuðborgarsvæðinu sé orðin útibú frá Miðflokknum í Facebook-færslu sem hann skrifaði á dögunum.

Vekur Einar athygli á að lögreglan á höfuðborgarsvæðinu hafi undanfarið birt Facebook-færslur þar sem tíunduð eru meint brot erlendra ríkisborgara. Segist stærðfræðingurinn skilja ef sagt yrði frá öllum brotum sem framin eru en þarna sé spjótunum einungis beint að útlendingum.

Hér má sjá færsluna:

„Er Lögreglan á höfuðborgarsvæðinu orðin útibú frá Miðflokknum?

Á FB-síðu hennar hafa síðasta mánuðinn birst fjórir póstar í allt sem fjalla um (meint) brot einhvers fólks. Nú væri skiljanlegt ef lögreglan hefði þá reglu að segja frá hér á FB öllum brotum sem hún kemst á snoðir um. En svo er ekki; þessar frásasgnir fjalla allar um erlenda ríkisborgara.

1. des: Erlendum ríkisborgara var vísað frá Íslandi í gær, en um er að ræða karlmann um fertugt sem var handtekinn í fyrradag vegna þjófnaðarmála í miðborginni.

11, des: "Tveimur erlendum ríkisborgurum, karli og konu á þrítugsaldri, hefur verið vísað brott frá Íslandi samkvæmt ákvörðun Útlendingastofnunar á grundvelli 1., sbr. 2. mgr. 95. gr. laga um útlendinga nr. 80/2016. Fólkið var handtekið 19. nóvember vegna þjófnaðarmála á höfuðborgarsvæðinu ..."

21 nóv: "Tveimur erlendum ríkisborgurum hefur verið frávísað frá Íslandi og fara þeir af landi brott í kvöld. Um er að ræða karlmenn á fertugsaldri, en þeir voru handteknir um kvöldmatarleytið í gær eftir að tilkynnt var um vasaþjófa nærri Skólavörðuholti.|

20. nóv: "Karl og kona á þrítugsaldri voru í dag í Héraðsdómi Reykjavíkur úrskurðuð í gæsluvarðhald til 3. desember að kröfu Lögreglunnar á höfuðborgarsvæðinu í þágu rannsóknar hennar á auðgunarbrotum. Fólkið var handtekið í gær eftir að tilkynnt var um þjófnað í verslun í austurborginni. Um er að ræða erlenda ríkisborgara, sem eru jafnframt grunaðir um fleiri þjófnaði í Reykjavík undanfarna daga".“

Viðbrögðin við færslu Einars voru töluverð en fólk skiptist í tvær fylkingar í athugasemdarkerfinu. Á meðan sumir tóku undir með Einari, eins og Þorsteinn nokkur sem skrifaði: „Einmitt. Með því að fjalla einungis um brot útlendinga er ýtt undir þá ranghugmynd að meira og minna öll brot séu útlendingum að kenna. Og viðbrögð margra í athugasemdum hér bera því einmitt vitni að Miðflokknum og nú lögreglunni er að takast ágætlega upp við þetta verkefni“, voru flestir ósammála stærðfræðingnum og hrósuðu lögreglunni fyrir færslurnar.