Tónlistarmaðurinn Svavar Knútur gagnrýnir harðlega nýtt æði sem tröllríður nú Facebook, þar sem notendur deila myndum af sjálfum sér sem búnar eru til með gervigreind en myndirnar eru byggðar á starfi og áhugamálum fólks. Í tveimur Facebook-færslum lætur hann óánægju sína skýrt í ljós og segir umrædda þróun langt frá því að vera saklaust gaman.

Í fyrri færslunni lýsir Svavar Knútur furðu sinni á því sem hann sér í streymi sínu og segir þróunina hættulega. „Hvaða martraðardæmi er í gangi í story feedinu mínu? Eru allir gengnir af göflunum að taka þátt í að normalisera AI ógeð? Nei, þetta er ekkert bara saklaust gaman. Þetta er normalisering á arðráni tæknigeirans,“ skrifar hann.

Í seinni færslunni heldur tónlistarmaðurinn áfram gagnrýninni, en beinir henni jafnframt að skapandi valkostum utan gervigreindar en með færslunni birtir hann sjálfsmynd sem hann gerði á tveimur mínútum.

„Troddu þessu upp í gervigreindina á þér. Þetta tók mig tvær mínútur. Er mannlegt. Fullt af ófullkomnun. Miklu fokkíng skemmtilegra en þetta sálarlausa ógeð sem fólk að deila,“ skrifar hann og bætir við að það sem fólk geri sjálft hafi að minnsta kosti einhverja sál. „Og það fáránlega er að bara þetta einfalda asnalega drasl er allavega með einhverja lágmarks sál. Fokking reyna að halda í sálina fólk!“

Að lokum skorar Svavar Knútur á fólk að snúa baki við gervigreindarmyndum og leggja rækt við eigin sköpun. „Áskorun! Gerið skopmynd af sjálfum ykkur á max 5 mínútum og deilið! Finnið dópamínið flæða verðskuldað!“