Glæsilegt einbýlishús á einni hæð í Garðabæ hefur verið sett á sölu og óska eigendur eftir tilboðum í eignina.

Húsið, sem stendur við Stekkjarflöt 2, var byggt árið 2011 og er samtals 294,8 fermetrar að stærð, þar af er íbúðarrými 249,7 fermetrar og bílskúr 45,1 fermetrar.

Samkvæmt upplýsingum úr sölulýsingu skiptist eignin í rúmgott anddyri, hol, bjarta stofu, eldhús og borðstofu í opnu rými. Þá eru þrjú til fjögur svefnherbergi í húsinu, þar á meðal glæsileg hjónasvíta með sér baðherbergi. Auk þess eru tvö baðherbergi í eigninni, þar af eitt inn af hjónasvítu, ásamt gestasalerni, þvottahúsi og geymslu.

Eitt af sérkennum hússins er aukin lofthæð í öllum rýmum sem gefur eigninni opið og rúmgott yfirbragð. Frá stofu og eldhúsi er beint aðgengi út í lokaðan og vel hannaðan garð sem er bæði stílhreinn og fjölbreyttur, með steyptum palli, timburverönd og grasflötum.

Bílskúrinn tengist garðinum og hefur verið útbúinn með fullkominni líkamsræktaraðstöðu með helstu tækjum. Þá er eignin búin gólfhita í öllum rýmum, vönduðum innréttingum og steinlögðum borðflötum í eldhúsi.

Lóðin er 673 fermetrar að stærð og fullfrágengin með snjóbræðslukerfi í plani.