Fjórir gista fangageymslu lögreglu er meðal þess sem kemur fram í dagbók lögreglunnar á höfuðborgarsvæðinu vegna verkefna hennar frá því síðdegis í gær þar til snemma í morgun.

Gríðarlegt magn þýfis haldlagt

Einn var handtekinn miðsvæðis í Reykjavík fyrir innbrot í bifreið. Sá var mjög illa haldinn af fíkniefnaneyslu og var fluttur á lögreglustöð en í fórum hans fannst gríðarlegt magni þýfis af ýmsu tagi. Var hann vistaður í fangaklefa í þágu rannsóknar málsins og þýfið haldlagt og skráð í kerfi lögreglu.

Einn var handtekinn fyrir að aka rafhlaupahjóli undir áhrifum áfengis. Var hann látinn laus að lokinni blóðsýnatöku.

Sparkaði í lögreglumann

Annar var handtekinn í miðbæ Reykjavíkur fyrir brot á lögreglusamþykkt. Sá sparkaði í lögreglumann á vettvangi, lét mjög illa við komu á lögreglustöð og var vistaður í fangaklefa í þágu rannsóknar málsins.

Ráðist á dyraverðir

Þá var einn handtekinn grunaður um að hafa ráðist á tvo dyraverði í miðbænum. Sá var með skurð á hendi eftir átökin og fékk aðstoð sjúkraliðs á lögreglustöð.

Nokkrir voru handteknir grunaðir um akstur undir áhrifum og einn var kærður fyrir að fara yfir á rauðu.