Ökumenn á höfuðborgarsvæðinu lentu í verulegum umferðartöfum síðdegis í gær þegar malbikunarframkvæmdir settu umferð úr skorðum. Ástandið varð svo slæmt að einhverjir ökumenn ákváðu að leggja bifreiðum sínum og halda leiðar sinnar fótgangandi.
Þetta kemur fram í samtali Vísis við Árna Friðleifsson, aðstoðaryfirlögregluþjón umferðardeildar lögreglunnar á höfuðborgarsvæðinu.
Að sögn Árna mátti rekja umferðaröngþveitið að stórum hluta til lokunar á akstursleið frá Bústaðavegi inn á Kringlumýrarbraut til suðurs. Áhrifanna gætti víða um höfuðborgarsvæðið enda mynduðust langar bílaraðir á helstu stofnæðum.
Þá telur hann líklegt að afsláttardagurinn Singles Day hafi einnig stuðlað að aukinni umferð, sérstaklega í nágrenni verslunarmiðstöðva.
Þótt ökumenn hafi þurft að sýna mikla þolinmæði urðu engin alvarleg slys vegna umferðartafanna. Árni segir hins vegar að óþreyja ökumanna hafi aukist eftir því sem biðin lengdist.
Fyrsta snjókoma vetrarins í höfuðborginni varð síðan til þess að fresta þurfti malbikunarframkvæmdum sem fyrirhugaðar voru í dag. Eitt umferðarslys hafði verið tilkynnt vegna hálku fyrr í dag.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir