Gamanleikarinn Anthony Clark látinn

Gam­an­leik­ar­inn Anthony Clark, sem fór meðal ann­ars með hlut­verk í sjón­varps­þátt­unum Yes, Dear og Boston Common, lést í gær. Mike O’Malley, fyrr­ver­andi sam­starfs­maður hans úr Yes, Dear, stað­festi and­látið í færslu á sam­fé­lags­miðlum. Clark var 62 ára.

„Hann var ótrú­lega fynd­inn maður,“ skrif­aði O’Malley í minn­ing­ar­færslu sem hann birti á Instagram 12. nóv­em­ber.

„Hann var ein­stakur, einn af þessum grínistum sem hló með manni að fárán­leik­anum í eigin sögum og athug­unum. Það fékk mann til að hlæja enn meira, ein­fald­lega vegna þess að hann var sjálfur að hlæja. Ég var aðdá­andi hans áður en við urðum vinir. Við töl­uðum saman í síma fyrir þremur vikum. Hann fékk okkur til að hlæja dátt, eins og hann gerði alltaf.“

O’Malley, sem lék á móti Clark í Yes, Dear, birti einnig myndir frá síð­asta töku­degi þeirra og rifj­aði upp þann dag.

„Hér fylgja nokkrar myndir frá síð­asta þætt­inum okkar af Yes, Dear, en tutt­ugu ár eru liðin frá því að þátta­röð­inni lauk,“ skrif­aði hann. „Hann fór vel með pen­ing­ana sína og dró sig í raun í hlé eftir að við kláruðum tök­urnar. Hvíldu í friði, Tony.“

Clark var frá Virg­in­íu­ríki í Banda­ríkj­unum og stund­aði nám við Emerson-háskól­ann. Hann lék fyrst í sjón­varpi árið 1991 í þátt­unum American Playhouse.

Í kjöl­farið fékk hann hlut­verk í gam­an­þátt­unum Ellen, með Ellen DeGeneres í aðal­hlut­verki, og róm­an­tísku gam­an­mynd­inni The Thing Called Love. Árið 1996 fékk hann hlut­verk Boyd Pritchett í þátta­röð­inni Boston Common.

Síðar fór hann með hlut­verk Greg Warner, stjórn­anda í sjón­varps­brans­anum, í 122 þáttum af Yes, Dear. Þar lék hann meðal ann­ars á móti Mike O’Malley, Jean Louisa Kelly og Liza Snyder.

Samhliða leik­list­inni byggði Clark upp feril sem uppi­stand­ari. Árið 2006 var hann kynnir í fjórðu þátta­röð raun­veru­leika­þátt­anna The Last Comic Standing.

Eftir að Yes, Dear lauk birt­ist Clark í nokkrum minni hlut­verkum í kvik­myndum en dró sig síðan alfarið úr sviðs­ljós­inu.

Þeir sem þekktu hann taka undir orð umboðs­manns hans, Barry Katz, sem minnt­ist hans einnig á sam­fé­lags­miðlum og sagði Clark „án efa einn fyndn­asta mann sem ég hef nokkru sinni kynnst á ævinni“.

Ekki hefur verið greint frá dán­ar­or­sök hans.