Birkir Fjalar Viðarsson, söngvari hardcorehljómsveitarinnar I Adapt, og fjölskylda hans hafa sett glæsilega sérhæð í Teigunum í Reykjavík á sölu. Ásett verð eignarinnar er 144,9 milljónir króna.
Um er að ræða bjarta og rúmgóða fimm herbergja sérhæð í húsi sem var reist árið 1949. Eignin hefur verið endurnýjuð að verulegu leyti að innan og henni fylgir bílskúr sem hefur verið innréttaður sem tveggja herbergja íbúð.
Sérhæðin er staðsett í einu af grónari íbúðahverfum Reykjavíkur, skammt frá Laugardalnum, þar sem finna má fjölbreytta möguleika til útivistar og íþróttaiðkunar. Þá er stutt í verslanir og aðra helstu þjónustu.
Fjögur svefnherbergi og aukaíbúð
Á aðalhæð eignarinnar eru anddyri, rúmgott hol, eldhús, borðstofa, stofa, baðherbergi og þrjú svefnherbergi. Fjórða svefnherbergið er í kjallara hússins, þar sem einnig er að finna sameiginlegt þvottahús og baðherbergi.
Bílskúrnum hefur verið breytt í tveggja herbergja íbúð, en sú íbúð er ósamþykkt. Samkvæmt sölulýsingu eru möguleikar á að nýta eignina þannig að þar verði tvær útleigueiningar.
Eignin hefur tekið töluverðum breytingum frá því að húsið var reist fyrir tæpum átta áratugum og hefur íbúðin verið endurnýjuð að miklu leyti á undanförnum árum.
Fjölskyldan hefur nú ákveðið að selja eignina og er óskað eftir 144,9 milljónum króna fyrir sérhæðina ásamt bílskúrnum.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir