Eigendur Volkswagen ID. Buzz, ID.4 og ID.7 árgerða 2023 og 2024 eru hvattir til að hlaða bifreiðar sínar ekki umfram 80% vegna hættu á ofhitnun og mögulegum eldsvoða í háspennurafhlöðu.
Hekla hefur tilkynnt Húsnæðis- og mannvirkjastofnun (HMS) um innköllun á umræddum bifreiðum vegna þess að í ljós hefur komið að íhlutir í háspennurafhlöðum þeirra kunna að vera gallaðir og uppfylla ekki tilskildar gæðakröfur.
Bilun í íhlutunum getur valdið því að rafhlaðan ofhitni þegar hún er nálægt því að vera fullhlaðin. Í versta falli getur það leitt til þess að kvikni í rafhlöðunni.
Eigendur bifreiðanna eru því beðnir um að takmarka hleðslu þeirra við 80% af hámarksgetu rafhlöðunnar þar til annað verður tilkynnt.
Hekla hvetur eigendur til að hafa samband við fyrirtækið til að kanna hvort innköllunin eigi við um þeirra bifreið.
Unnið er að þróun hugbúnaðar sem fylgist með ástandi rafhlaðna og hleðsluhegðun bílanna. Þegar hugbúnaðurinn verður tilbúinn verður hann settur upp í viðkomandi ökutæki og mun Hekla hafa samband við eigendur vegna þess.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir