Kim Kardashian neyðist til að endurgreiða viðskiptavinum

SKIMS, fata­merki Kim Kar­dashian, hefur ákveðið að bjóða við­skipta­vinum end­ur­greiðslu eftir harða gagn­rýni á aðventu­daga­tal fyr­ir­tæk­is­ins, sem kost­aði 148 doll­ara.

Fyr­ir­tækið seg­ist vera með­vitað um gagn­rýn­ina sem aðventu­daga­tal þess með fylgi­hlutum hefur fengið. Í yfir­lýs­ingu til TODAY.com þann 8. nóv­em­ber kom fram að við­skipta­vinum yrði boðin end­ur­greiðsla þar sem „daga­talið stóðst ekki vænt­ingar sumra“.

„Við höfum haft per­sónu­legt sam­band við alla við­skipta­vini sem keyptu daga­talið og boðið þeim að velja á milli fullrar end­ur­greiðslu eða inn­eignar hjá SKIMS sem hægt er að nota til kaupa á öðrum vörum,“ sagði í yfir­lýs­ing­unni.

„Við viljum að allir við­skipta­vinir séu virki­lega ánægðir með það sem þeir fá frá SKIMS. Álit þeirra skiptir okkur máli og mun hafa bein áhrif á hvernig við stöndum að útgáfu nýrra vara í fram­tíð­inni.“

Aðventu­daga­talið var fram­leitt í tak­mörk­uðu upp­lagi og kynnt sem tólf daga röð af óvæntum gjöfum. Þar átti meðal ann­ars að finna skemmti­lega smá­hluti og hvers­dags­lega fylgi­hluti á borð við hár­skraut og lykla­kippur. Varan er nú merkt sem upp­seld á biðlista á vef­síðu SKIMS.

Við­skipta­vinir voru hins vegar langt frá því að vera ánægðir með inni­haldið. Gagn­rýnin varð svo hörð að fólk kall­aði daga­talið „svindl“ á sam­fé­lags­miðlum og krafð­ist þess að fá pen­ing­ana sína til baka.

Í einu mynd­skeiði á TikTok, sem hefur fengið nærri 65 millj­ónir áhorfa, tók óánægður við­skipta­vinur daga­talið upp úr umbúð­unum og sýndi inni­haldið. Þar mátti meðal ann­ars sjá lykla­kippur, hár­nálar, jóla­skraut, hárteygjur og ýmsa aðra smá­hluti sem féllu henni ekki í geð.

„Kimberly, þú ert í alvör­unni að fara að gera mig brjál­aða,“ sagði konan í mynd­skeið­inu. „Þetta er allt of dýrt.“

Fjöl­margir tóku undir gagn­rýn­ina í athuga­semdum við mynd­skeiðið. Sumir köll­uðu vör­una „kassa fullan af hrekkjum“ en aðrir sögðu að inni­haldið liti út eins og Kim hefði verið að tæma nátt­borðs­skúff­una sína.

Einn skrif­aði að daga­talið inni­héldi í raun „allt það sem fellur á milli bílsæt­anna hjá mér“. Annar sagði að konan hefði „sparað svo mörgum pen­ing“ með því að birta mynd­skeiðið og sýna hvað væri í daga­tal­inu.

Þetta er ekki í fyrsta sinn sem óvenju­legar vörur SKIMS vekja gagn­rýni. Þegar vöru­merkið kynnti nær­buxur með gervi­kyn­hárum á síð­asta ári brást Kim Kar­dashian sjálf við ummæl­unum.

„Ég er eig­in­lega orð­laus,“ sagði hún við E! News í októ­ber síð­ast­liðnum. „Þetta vakti svo mikla athygli, við höfum hlegið og rætt þetta allan dag­inn.“

Stjarnan úr raun­veru­leika­þátt­unum The Kar­dashi­ans bætti þá við að hug­myndin hefði ein­fald­lega verið „skemmti­leg og kjána­leg“ og kviknað í tengslum við mynda­töku sem hún tók þátt í.