Það þarf ekki kynferðislegt samband til að traust í ástarsambandi geti beðið hnekki. Smávægileg samskipti við aðra geta farið yfir mörkin, sérstaklega þegar þeim er haldið leyndum.
Hugtakið microcheating, eða örframhjáhald, hefur verið notað yfir hegðun á borð við að senda daðrandi skilaboð, líka ítrekað við myndir ákveðins einstaklings á samfélagsmiðlum eða eyða skilaboðum til að makinn komist ekki að þeim.
Engin algild skilgreining er til á því hvað telst smáframhjáhald. Það fer eftir mörkum og væntingum fólksins í sambandinu. Sálfræðingurinn Debra Feinberg segir að hugtakið vísi til lítilla, oft leyndra athafna sem geta farið yfir tilfinningaleg mörk án þess að um eiginlegt framhjáhald sé að ræða.
Meðferðaraðilinn Kristen Anthis segir að leyndin skipti oft meira máli en sjálf athöfnin. Hún ráðleggur fólki að spyrja sig hvort það myndi haga sér eins ef makinn væri viðstaddur og hvort það væri að beina tilfinningalegri orku frá sambandinu yfir í samskipti við einhvern annan.
Mörkin eru ekki alltaf augljós
Hjónabands- og fjölskyldumeðferðarfræðingurinn Cheryl Groskopf segir að fólk geri oft ráð fyrir að bæði í sambandinu hafi sömu hugmynd um hvað hollusta þýði. Það sé þó ekki sjálfgefið. Það sem einum finnst saklaust daður getur valdið óöryggi og vanlíðan hjá öðrum.
Því sé mikilvægt að ræða opinskátt um mörkin í sambandinu í stað þess að gera ráð fyrir að þau séu öllum ljós. Pör þurfi að finna sameiginlegan grundvöll um hvað þeim finnst ásættanlegt í samskiptum við annað fólk.
Ef maki segir að ákveðin hegðun særi hann sé mikilvægt að hlusta og reyna að skilja hvers vegna, en jafnframt þurfi mörkin að vera sanngjörn gagnvart báðum.
Hvernig er hægt að endurbyggja traust?
Ef annar aðilinn telur að farið hafi verið yfir mörkin ráðleggja sérfræðingarnir að ræða málið án þess að grípa strax til ásakana. Mikilvægt sé að skilja hvað lá að baki hegðuninni og hvaða áhrif hún hafði á sambandið.
Sá sem fór yfir mörkin þurfi að taka ábyrgð á gjörðum sínum og vera tilbúinn að breyta hegðun sinni. Ef báðir aðilar sýna vilja til að hlusta og skilja hvor annan geti verið hægt að endurbyggja traustið.
Örframhjáhald er því ekki endilega smávægilegt mál. Jafnvel saklaus samskipti geta grafið undan trausti ef þeim er haldið leyndum eða þau brjóta gegn þeim mörkum sem parið hefur sett sér.
Grein þessi er byggð á umfjöllun Cosmopolitan.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir