Gunnar Þórarinsson, fyrrverandi bæjarfulltrúi í Reykjanesbæ, lést á Hjúkrunarheimilinu Nesvöllum 3. nóvember síðastliðinn, 77 ára að aldri. Frá andláti hans var greint í Víkurfréttum.
Gunnar fæddist í Reykjavík 11. apríl 1949 og ólst upp í Vogahverfinu. Hann lauk stúdentsprófi frá Menntaskólanum í Reykjavík árið 1969, húsasmíðanámi frá Iðnskólanum í Reykjavík 1972 og cand.oecon.-prófi í viðskiptafræði frá Háskóla Íslands árið 1975.
Hann starfaði meðal annars hjá Verðlagsskrifstofunni og kenndi viðskiptagreinar við Fjölbrautaskóla Suðurnesja í 15 ár. Síðar stofnaði hann og rak Rekstrarþjónustuna ásamt eiginkonu sinni.
Gunnar var bæjarfulltrúi í Reykjanesbæ árin 2010–2022, fyrst fyrir Sjálfstæðisflokkinn en síðar fyrir Frjálst afl, sem hann stofnaði ásamt fleirum árið 2014. Hann var forseti bæjarstjórnar 2010–2011 og formaður bæjarráðs 2011–2014. Þá var hann stjórnarformaður HS Veitna árin 2015–2019.
Hann lét einnig mikið til sín taka í íþróttastarfi á Suðurnesjum. Gunnar lék knattspyrnu og handbolta með Fram, Breiðabliki og Njarðvík, var formaður knattspyrnudeildar UMFN og Íþróttabandalags Suðurnesja. Þá var hann formaður Golfklúbbs Suðurnesja árin 2002–2008. Hann hlaut ýmsar viðurkenningar fyrir störf sín að íþróttamálum.
Gunnar sat jafnframt um árabil í sóknarnefnd Ytri-Njarðvíkurkirkju.
Eftirlifandi eiginkona hans er Steinunn Sighvatsdóttir. Þau eignuðust þrjú börn og áttu 12 barnabörn og eitt barnabarnabarn.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir