Stóð á haus í 6.935. skipti á afmælisdaginn

Karl Ágúst Úlfsson, leik­ari og rit­höf­undur, fagn­aði 69 ára afmæli sínu í gær og fékk af því til­efni fjölda afmælis­kveðja, meðal ann­ars frá vinum og gömlum skóla­fé­lögum í Banda­ríkj­unum. Í gam­an­samri færslu á Facebook seg­ist hann þó hafa fengið sér­staka kveðju frá banda­rísku þjóð­inni, sem hafi kosið „rétt“ í þing­kosn­ingum þar í landi, í til­efni af afmæl­inu.

„Fyrir þann heiður þakka ég hrærður,“ skrifar Karl Ágúst, en bætir við að hann hafi hins vegar ekki fengið neina vin­ar­kveðju frá Donald Trump.

Í færsl­unni gerir hann einnig grín að því að sam­fé­lags­mið­ill­inn Facebook hafi túlkað töl­una 69 með nokkuð sér­stökum hætti.

„Nú er sem sagt runnin upp talan 69. Hún þótti ákaf­lega mögnuð og merki­leg þegar ég var yngri, miklu merki­legri en 70, einkum vegna þess hvað hún væri kyn­ferð­is­leg eða jafn­vel klám­fengin. Kannski var það ástæðan fyrir því að í gær reyndi fés­bókin enda­laust að selja mér stinn­ing­ar­lyf, örvandi krem og ýmis konar hólka og tappa sem ég botn­aði lítið sem ekk­ert í. “

Hann grín­ast með að Facebook virð­ist hafa talið sig þurfa meira á slíkum vörum að halda en þakk­læt­inu sem hann var að reyna að koma á fram­færi við þá sem ósk­uðu honum til ham­ingju með dag­inn.

Karl Ágúst segir að Facebook hafi ítrekað frosið þegar hann reyndi að svara afmælis­kveðj­unum og veltir því fyrir sér hvort það hafi verið vegna álags­ins, töl­unnar 69 eða jafn­vel orku­notk­unar hug­bún­að­ar­ins.

„Þegar ég afþakk­aði aftur og aftur það sem í boði var sýndi hún mér ýmist hæðni, pirr­ing, óþol­in­mæði eða jafn­vel fyr­ir­lit­ingu og fraus slag í slag - kannski vegna fjöld­ans sem ég var að reyna að þakka. Eða kannski var það 69 að kenna. Eða kannski var það Lands­virkjun sem var að reyna að halda mér í skefjum vegna orkunnar sem hug­bún­að­ur­inn hám­aði í sig þegar ég reyndi æ ofan í æ að þakka fyrir mig. Var kannski verið að segja mér að ef ég ætl­aði að senda ykkur öllum kveðjur til baka þyrfti að finn­ast ný Kröflu­virkjun eða reisa nokkra tugi af vind­myllum,“ skrifar hann.

Að lokum seg­ist hann þó hafa náð að þakka öllum fyrir kveðj­urnar, þar á meðal banda­rísku þjóð­inni, þótt kveðjan frá Trump hafi ekki skilað sér. Hann grín­ast með að ein­hverjir ill­vilj­aðir Norðmenn kunni að hafa gómað hana og sturtað niður úr kamr­inum.

Færsl­unni lýkur á enn einni vísun í afmæl­is­ald­ur­inn. Karl Ágúst seg­ist hafa staðið á haus í 6.935. skipti „í þess­ari törn“ og segir það sína eigin leið til að vísa í töl­una 69: að standa til skiptis í lappir eða á haus en leik­ar­inn góð­kunni birtir með færsl­unni ljós­mynd af sér þar sem hann stendur á haus.