Talmeinafræðingar hefja störf í fjórum grunnskólum á höfuðborgarsvæðinu í vikunni samkvæmt tilkynningu frá stjórvöldum. Um er að ræða tveggja ára tilraunaverkefni að frumkvæði heilbrigðisráðuneytisins sem miðar að því að bæta aðgengi barna að talmeinaþjónustu og stytta langa biðlista en ekki er tekið fram hvaða grunnskólar eru þátttakendur í þessu verkefni.
Einn talmeinafræðingur frá Heyrnar- og talmeinastöð Heilsugæslu höfuðborgarsvæðisins verður staðsettur í hverjum skólanna fjögurra og mun veita börnum þjónustu í þeirra nærumhverfi.
Anna Ósk Sigurðardóttir, talmeinafræðingur og verkefnisstjóri, segir að áætlað sé að tíu til tólf prósent grunnskólabarna þurfi á talmeinaþjónustu að halda.
Verkefnið beinist að börnum með alvarleg frávik í málþroska og framburði sem uppfylla viðmið Sjúkratrygginga Íslands. Mörg þeirra hafa beðið lengi eftir þjónustu.
„Það er mikið í húfi að börn í þessari stöðu fái snemmtæka þjónustu sem hefur því miður ekki verið raunin. Ég hef væntingar um að þetta tilraunaverkefni eigi eftir að þroskast hratt og verða liður í bættri þjónustu við börn um allt land“ segir Alma D. Möller heilbrigðisráðherra um málið.
Athugasemdir