Íslenskur karlmaður hefur verið dæmdur í 22 mánaða óskilorðsbundið fangelsi í Héraðsdómi Suðurlands fyrir fjölmörg brot, þar á meðal þjófnað, nytjastuld, ölvunarakstur, fjársvik og eignaspjöll. Maðurinn á langan sakaferil að baki og hefur ítrekað verið dæmdur fyrir sambærileg brot.
Samkvæmt dómi, sem kveðinn var upp 4. nóvember, braust maðurinn ásamt öðrum inn í tvo sumarbústaði í landi Úteyjar í Bláskógabyggð í apríl 2024. Þaðan stálu þeir meðal annars áfengi, verkfærum, rafhlöðum og Bose-hátalara. Þýfið fannst síðar í sumarbústað þar sem maðurinn dvaldi.
Maðurinn játaði innbrotin við lögreglurannsókn en dró játningu sína síðar til baka. Dómurinn taldi hins vegar sannað að hann hefði tekið þátt í brotunum, meðal annars með hliðsjón af upptökum úr öryggismyndavélum.
Ók ölvaður með rúm tvö prómill
Maðurinn var jafnframt sakfelldur fyrir að aka bifreið án heimildar eiganda á 147 kílómetra hraða á Suðurlandsvegi, þar sem hámarkshraði var 90 kílómetrar. Hann hafði áður verið sviptur ökurétti ævilangt.
Í júní 2025 var hann einnig stöðvaður við akstur undir áhrifum áfengis, en vínandamagn í blóði hans mældist 2,02 prómill. Þá ók hann á 115 kílómetra hraða.
Sama mánuð sveik hann leigubílstjóra um greiðslu fyrir akstur frá Hvolsvelli og braut rúðu í lögreglubifreið í kjölfar afskipta lögreglu.
Langur sakaferill
Í dóminum kemur fram að sakaferill mannsins nái aftur til ársins 2006. Hann hefur meðal annars ellefu sinnum áður sætt refsingu fyrir akstur sviptur ökurétti og fimm sinnum fyrir þjófnaðarbrot.
Auk fangelsisrefsingarinnar var manninum gert að greiða 370 þúsund krónur í sekt, rúmar 2,2 milljónir króna í sakarkostnað og rúmar 152 þúsund krónur í skaðabætur vegna skemmda á lögreglubifreið.
Ævilöng svipting ökuréttar hans var jafnframt áréttuð.
Þjófnaður
Létu greipar sópa í Bónus, ELKO og Kids Coolshop
Reiðhjóli bæjarfulltrúans stolið: Lögreglan brýnir fyrir fólki að geyma þau innandyra
Athugasemdir