Eyjan sem átti að hverfa árið 2020 stendur enn upp úr sjó

Kol­beinsey stendur enn upp úr sjó þrátt fyrir að fyrir um 15 árum hafi verið ótt­ast að hún hyrfi með öllu árið 2020. Nýjar myndir úr eft­ir­lits­flugi Land­helg­is­gæsl­unnar benda til þess að hægt hafi á nið­ur­broti eyj­ar­innar. Þetta kemur fram á heima­síðu Gæsl­unnar.

Land­helg­is­gæslan hefur und­an­farin ár fylgst reglu­lega með Kol­beinsey, sem er um 74 kíló­metra norður af Grímsey, með eft­ir­lits­flugi. Áhöfn eft­ir­lits­flug­vél­ar­innar TF-SIF flaug nýverið yfir eyj­una og tók myndir af henni.

Af mynd­unum að dæma hefur hægt á nið­ur­broti Kol­beins­eyjar á síð­ustu árum. Eyjan stendur enn upp úr sjó, þótt hún hafi minnkað veru­lega í gegnum tíð­ina.

Fyrir um 15 árum var jafn­vel ótt­ast að Kol­beinsey yrði horfin með öllu árið 2020. Berggrunnur eyj­ar­innar er afar gljúpur og hafís hefur mikil áhrif á hana þau ár sem hann nær að umlykja hana.

Kol­beinsey gegndi áður mik­il­vægu hlut­verki í deilum um land­helgi og land­grunns­rétt­indi. Árið 1989 steyptu áhöfn varð­skips­ins Óðins og starfs­menn Vita- og hafna­mála­stofn­unar þyrlu­pall á eynni. Hún hefur hins vegar minnkað veru­lega síðan þá.

Land­helg­is­gæslan hefur fylgst reglu­lega með eyj­unni í gegnum árin, en mik­il­vægi hennar í tengslum við land­helg­is­mál minnk­aði að mestu eftir að samið var um mið­lín­una milli Íslands og Græn­lands ann­ars vegar og Íslands og Jan Mayen hins vegar.

Land­helg­is­gæslan hyggst halda áfram að fylgj­ast með ástandi Kol­beins­eyjar.

Í sama eft­ir­lits­flugi var einnig flogið yfir Hvalbak, sem er um 25 sjó­mílur undan Aust­ur­landi. Hval­bakur er einn af grunn­línu­við­mið­un­ar­stöðum Íslands vegna afmörk­unar land­helg­innar og hefur lítið látið á sjá í áranna rás.