Lögreglumaður sem dró upp skammbyssu og miðaði henni á samstarfsmann vegna þess að hann hitaði fisk í örbylgjuofni hefur misst starfið og verið sviptur lögregluréttindum sínum til frambúðar.
Michael DeBiase, 46 ára, virðist hafa verið svo ósáttur við hádegismat samstarfsmanns síns að hann dró upp skammbyssu sem lögregluembættið hafði útvegað honum og miðaði henni á manninn.
Atvikið átti sér stað í höfuðstöðvum lögreglunnar í Myrtle Beach í Suður-Karólínu þann 30. maí síðastliðinn en sagt var frá málinu í fjölmiðlum í gær.
Það sem hófst sem ágreiningur um umgengnisreglur í eldhúsi á vinnustað endaði með því að DeBiase var ákærður fyrir alvarlegt afbrot og eyðilagði starfsferil sinn eftir að hafa játað brot gegn allsherjarreglu.
Fyrrverandi rannsóknarlögreglumaðurinn var dæmdur í 90 daga skilorðsbundið fangelsi, sektaður um 350 dali, sem samsvarar um 42 þúsund krónum, og gert að skila lögregluréttindum sínum í Suður-Karólínu fyrir fullt og allt. Samkvæmt samkomulaginu þarf hann jafnframt að skuldbinda sig til að sækjast aldrei eftir því að fá réttindin aftur.
Samkvæmt gögnum úr dómsmáli sem vefmiðillinn The Smoking Gun hefur undir höndum hófst málið þegar samstarfsfélagi DeBiase ákvað að hita fisk í örbylgjuofni á skrifstofunni.
Lyktin sem fylgdi því féll greinilega ekki í kramið hjá DeBiase, sem leitaði uppi samstarfsmann sinn í fundarherbergi lögreglunnar, að því er Daily Mail greinir frá.
Í stað þess að leysa málið með samtali, kvörtun eða jafnvel óbeinum skilaboðum á miða á ísskápnum er DeBiase sagður hafa gripið til byssunnar. Rannsakendur segja að hann hafi tekið hana úr hulstrinu og miðað henni á samstarfsmann sinn.
Í handtökuskipun kemur fram að DeBiase hafi gengið að lögreglumanninum vegna þess að hann „hitaði fisk í örbylgjuofninum og olli þannig ólykt á skrifstofunni“.
Samstarfsmaðurinn, sem ekki hefur verið nafngreindur opinberlega, gaf síðar skýrslu til rannsakenda.
DeBiase gaf einnig sína frásögn af atburðarásinni, en upplýsingar um skýringar hans hafa ekki verið gerðar opinberar.
Hann var þegar í stað settur í leyfi á meðan skrifstofa faglegra staðla innan lögreglunnar og lögregluyfirvöld Suður-Karólínu rannsökuðu málið.
Innri rannsókn leiddi í ljós að DeBiase hafði brotið gegn fjölda reglna lögreglunnar og var hann í kjölfarið rekinn. Lögregluembættið tók skýrt fram að hegðun hans væri langt undir þeim kröfum sem gerðar væru til lögreglumanna.
„Þetta atvik endurspeglar ekki þau gildi sem karlar og konur í lögreglunni í Myrtle Beach sýna af sér á hverjum degi,“ sagði í yfirlýsingu embættisins.
DeBiase var handtekinn 2. júní og upphaflega ákærður fyrir að beina skotvopni að einstaklingi, sem telst alvarlegt afbrot samkvæmt lögum Suður-Karólínu.
Hann var vistaður í J. Reuben Long-fangelsinu í Horry-sýslu en síðar látinn laus gegn 5.000 dala tryggingu.
Athugasemdir