Flestir láta sér nægja að skella sér í bíó nokkrum sinnum á ári en Bandaríkjamaðurinn Glenwood Hoskin Jr. tók bíóáhugann á alveg nýtt stig. Hann fór nefnilega í kvikmyndahús hvorki meira né minna en 1.207 sinnum á einu ári og tryggði sér þar með sæti í Heimsmetabók Guinness.
Glenwood, sem er sextugur eftirlaunaþegi frá Pennsylvaníu í Bandaríkjunum, eyddi stórum hluta daganna frá apríl 2024 til apríl 2025 í kvikmyndahúsinu Regal í York Haven. Að meðaltali horfði hann á 3,3 kvikmyndir á dag, sem verður að teljast ansi myndarlegur skammtur af poppi og bíóupplifun.
Fyrra heimsmetið var 777 kvikmyndir á einu ári og var í eigu Zachariah Swope. Glenwood bætti það því um heil 430 skipti.
Glenwood tók verkefnið mjög alvarlega. Á hverjum morgni fór hann yfir sýningartíma dagsins og skipulagði bíóferðirnar þannig að hann næði sem flestum myndum, stundum frá morgni og langt fram undir miðnætti.
Hann segir skipulagninguna sjálfa hafa verið hluta af skemmtuninni og að honum hafi fundist frábært að komast út úr húsi og takast á við nýja áskorun.
Upphaflega ætlaði Glenwood raunar að reyna að slá heimsmetið í að horfa oftast á sömu kvikmyndina í bíó. Það met er 292 sýningar á Spider-Man: No Way Home.
Hann hætti þó við þá hugmynd og ákvað þess í stað að horfa á eins margar myndir og mögulegt væri.
Athugasemdir