Nicole Taylor úr kántrýsveitinni Taylor Red látin, 35 ára að aldri

Nicole Taylor, sem var með­limur Kán­trýtríós­ins Taylor Red ásamt ein­eggja þrí­bura­systrum sínum, Niku og Natalie Taylor, lést 28. sept­em­ber eftir bar­áttu við brjóstakrabba­mein. Systur hennar greindu frá and­lát­inu. Nicole var 35 ára.

„Við erum harmi slegnar og í áfalli yfir því að þurfa að til­kynna and­lát systur okkar, Nicole Taylor. Þetta er ekki mynd­bandið sem við héldum að við myndum nokkurn tíma þurfa að taka upp,“ sagði Natalie við hlið Niku í mynd­bandi sem þær birtu á YouTube 2. nóv­em­ber.

„Við erum enn að reyna að átta okkur á öllu. Það er virki­lega erfitt að tala um þetta, en við ætlum að gera okkar besta til að segja frá sögu hennar.“

Syst­urnar stofn­uðu sveita­tón­list­ar­tríóið Taylor Red, sem áður hét Red Roots, árið 2011. Þær náðu þó ekki miklum vin­sældum fyrr en árið 2021 þegar lag þeirra, „Country Money“, fór á flug á sam­fé­lags­miðlum.

Nika og Natalie greindu frá því að Nicole hefði greinst með mjög ágengt brjóstakrabba­mein á þriðja stigi ári síðar, árið 2022.

Þær höfðu von­ast eftir góðum bata, en Nika sagði að þær hefðu nú fundið frið í þeirri vissu að Nicole væri laus undan þján­ingum.

„Við héldum að hún yrði hér með okkur og segði frá því hvernig henni hefði batnað hér á jörðu, en í stað­inn erum við hér að segja frá lækn­ingu hennar á himnum,“ sagði Nika.

Syst­urnar rifj­uðu báðar upp augna­blikið þegar þær voru með eldri systur sinni þegar hún fékk grein­ing­una.

„Ég man bara að ég brotn­aði algjör­lega niður úr áfalli,“ sagði Natalie. „Ég var svo hissa. Við höfum verið svo heppnar að búa við góða heilsu alla ævi og þetta kom því mjög mikið á óvart. Við áttum alls ekki von á þessu.“

Hún bætti við að hún hefði grátið og hlaupið fram á gang til að segja Niku tíð­indin. Nicole hefði þá sagt: „Guð mun nota þetta sér til dýrðar.“

Nicole brást vel við með­ferð­inni og á einum tíma­punkti var henni sagt að engin merki væru um krabba­mein í lík­am­anum. Sjúk­dóm­ur­inn tók sig hins vegar upp aftur og hafði þá þró­ast yfir á fjórða stig. Þá var henni sagt að hún ætti aðeins um þrjá mán­uði eftir ólif­aða.

Nicole lét þó ekki þær spár stöðva sig og hélt áfram að berj­ast af miklu hug­rekki. Hún lifði í eitt ár til við­bótar áður en hún lést í sept­em­ber.

Í kjöl­far miss­is­ins sagði Natalie að trú hennar hefði styrkst enn frekar.

„Ég hef verið kristin lengi og svona reynsla getur ann­að­hvort fært mann nær Guði eða fjar­lægt mann frá honum. Þessi raun hefur fært mig nær honum. Ég veit ekki hvernig nokkur maður gæti kom­ist í gegnum svona án Guðs,“ sagði hún.

Syst­urnar stað­festu á vef­síðu sveit­ar­innar að fjöl­skyldan hefði haldið útför Nicole í kyrr­þey.

„Nicole, sem var elst okkar þriggja systra, verður sárt saknað,“ sögðu þær.

„Hún var leið­togi okkar og besta vin­kona. Við erum harmi slegnar, en vitum að hún er á himnum og að við munum hitta hana aftur.“