Leikkonan Bridget Fonda hefur látið lítið fyrir sér fara undanfarin ár en sást nýverið á almannafæri í Los Angeles, rúmum 24 árum eftir að hún hætti leiklistarstörfum.
Fonda, sem er 62 ára, sást í borginni 2. nóvember þar sem hún snæddi hádegisverð með vini sínum. Hún var klædd í hvítan bol, svartar íþróttabuxur og víða gula skyrtu. Hún var með hárið í tagli og bar svarta tösku.
Fonda hefur að mestu haldið sig frá sviðsljósinu frá því hún lagði leiklistarferilinn á hilluna. Síðasta hlutverk hennar var í sjónvarpsþáttaröðinni Snow Queen árið 2002.
Hún hefur síðan einbeitt sér að fjölskyldulífinu með eiginmanni sínum, tónlistarmanninum og tónskáldinu Danny Elfman, en þau hafa verið gift í 23 ár. Saman eiga þau soninn Oliver, sem er 21 árs.
Fonda hefur áður gefið skýrt til kynna að hún hafi engan áhuga á að snúa aftur til leiklistar. Þegar ljósmyndari spurði hana út í mögulega endurkomu árið 2023 svaraði hún: „Það er svo gott að vera bara venjuleg manneskja.“
Úr þekktri Hollywood-fjölskyldu
Bridget Fonda kemur úr einni þekktustu leiklistarfjölskyldu Bandaríkjanna. Hún er dóttir leikarans Peter Fonda, barnabarn Hollywood-goðsagnarinnar Henry Fonda og frænka leikkonunnar Jane Fonda.
Þrátt fyrir að hafa alist upp í nánum tengslum við Hollywood hefur hún sagt að æska hennar hafi verið mun venjulegri en margir ímyndi sér.
„Fólk heldur að ég hafi verið skilin eftir í einhverju horni á eiturlyfjamenguðum orgíum og að við höfum verið eins og villimenn úti í skógi, en þannig var það alls ekki,“ sagði hún í viðtali við The Guardian árið 2000.
Hún lýsti foreldrum sínum sem skapandi og hvatvísum einstaklingum en sagði jafnframt að þau hefðu lagt áherslu á aga og góða siði.
„Pabbi minn var kannski hippalegur mótorhjólakappi í augum almennings,“ bætti hún við, „en hann var alltaf glæsilegur og vel til hafður hippi.“
Bridget Fonda sló í gegn í kvikmyndum á borð við Single White Female og Jackie Brown en ákvað að yfirgefa Hollywood eftir að hafa leikið í Snow Queen árið 2002.
Athugasemdir