Reynd ísraelsk leikkona hefur lent í miðjum fjölmiðlastormi eftir að hafa lýst því yfir, án þess að vita að upptaka væri í gangi, að hún væri „ekki lengur stolt af því að vera Ísraeli“ í beinni útsendingu í ísraelsku sjónvarpi.
Leikkonan Chelli Goldenberg, 72 ára, kom stjórnendum þáttarins í opna skjöldu og vakti undrun áhorfenda þegar hún lét þessi orð falla í umræðuþætti á sjónvarpsstöðinni Channel 13 í Ísrael á dögunum.
Goldenberg tók þátt í pallborðsumræðum í sjónvarpssalnum en virtist telja að útsendingin hefði verið rofin og auglýsingahlé hafið.
Þegar hún hélt að slökkt væri á myndavélum og hljóðnemum gagnrýndi hún afdráttarlaust þróun mála í Ísrael og stefnu stjórnvalda gagnvart palestínskum yfirráðasvæðum.
Ummælin fóru hins vegar í beinni útsendingu og hafa síðan vakið mikla athygli á samfélagsmiðlum víða um heim.
Í gagnrýni sinni beindi Goldenberg sjónum meðal annars að stjórnmálaástandinu í Ísrael og áratugalangri herveru landsins á Vesturbakkanum og Gaza.
Meðal þess sem hún sagði var:
„Ég vil svo sannarlega geta fundið aftur til gleði yfir því að vera Ísraeli. Ég vil það, en ég er ekki lengur stolt af því að vera Ísraeli.“
„Ég er ekki að segja þetta í útsendingu. Ég er að segja þetta í hljóði.“
Goldenberg ræddi einnig um uppvöxt sinn eftir 1954 og hvernig hún hefði, meira en áratug eftir hernám Ísraels árið 1967, áttað sig á því sem hún kallaði „synd hernámsins“. Hún sagði atburði síðari ára og núverandi ástand vera bein afleiðing þess.
„Við erum hernámsríki, já,“ sagði hún.
Hún kenndi hernáminu meðal annars um trúarlega þvingun, landtökubyggðir, hryðjuverk gyðinga og hroka.
„Minnihluti hefur rétt til að berjast fyrir frelsi sínu,“ sagði hún enn fremur.
Þegar Goldenberg áttaði sig á því að samtalið hafði farið í beina útsendingu brást hún við með undrun og spurði: „Voru myndavélarnar í gangi meðan við ræddum þetta? Það er ekki í lagi.“ Hún spurði einnig hvort samtalið hefði verið sent út.
Baðst afsökunar í beinni útsendingu
Eftir að henni varð ljóst að hljóðnemarnir hefðu verið opnir baðst Goldenberg afsökunar á ummælum sínum.
„Ég er hvatvís og ástríðufull manneskja sem talaði án þess að vita að hljóðnemarnir væru opnir. Ég er mikill föðurlandsvinur,“ sagði hún.
Athugasemdir