Ítölskum kokki var sagt upp störfum á veitingastað í Brisbane í Ástralíu eftir að hann neitaði að setja ananas á pítsur. Sagði hann það vera „móðgun við menningu sína“.
Davide Tamburella var rekinn frá veitingastaðnum La Costa í maí eftir að stjórnendur höfðu fengið fjölda kvartana vegna framkomu hans en BBC fjallaði um málið í dag. Meðal annars neitaði hann að útbúa skinku- og ananaspítsur fyrir gesti í einkasamkvæmi og sagði að hann þyrfti ekki að fylgja fyrirmælum sem móðguðu menningu hans.
Málið rataði fyrir áströlsku vinnumálanefndina eftir að Tamburella krafðist þess að uppsögnin yrði úrskurðuð ólögmæt. Í úrskurði nefndarinnar kom fram að þetta væri í þriðja sinn á fjórum árum sem kokkurinn neitaði að nota ananas á pítsur.
Hann hafði áður beðið yfirmann sinn um að „kanna hversu mikilvægt það er fyrir Ítali að setja ekki ananas á pítsu“.
Aðrar kvartanir gegn kokknum snerust um orðbragð hans, samskiptastíl og skapofsaköst á vinnustaðnum. Í úrskurðinum var einnig fjallað um atvik þar sem hann handarbrotnaði eftir að hafa slegið höndinni í málmhandrið.
Tamburella hafði vonast til að veitingastaðurinn myndi styrkja umsókn hans um vegabréfsáritun sem gæti veitt honum fasta búsetu í Ástralíu. Ferlið var hins vegar stöðvað eftir uppsögnina.
Hann tapaði máli sínu fyrir vinnumálanefndinni þar sem umsóknin hafði verið lögð fram of seint.
Framkvæmdastjóri veitingastaðarins sagði við Daily Mail að „það væri meira á bak við þessa sögu en pítsuálegg“.
Tamburella starfar nú á öðrum veitingastað í Brisbane. Athygli vekur að þar er ananas ekki á matseðlinum.
Athugasemdir