Sigmar Vilhjálmsson athafnamaður minnir á að hann hafi ekki komið að rekstri Hamborgarafabrikkunnar frá árinu 2018 eða eignarhaldi og rekstri Hlöllabáta frá árinu 2022. Hann vill koma því á framfæri í kjölfar frétta af því að báðir veitingastaðirnir hafi verið innsiglaðir að beiðni Skattsins í vikunni.
Í færslu á Facebook segist Sigmar vita að margir tengi hann enn við bæði Fabrikkuna og Hlölla, sem hann taki sem hrósi. Hann leggur þó áherslu á að hann hafi ekki komið að rekstri staðanna um árabil.
„Þetta er nú meiri vikan. Ég veit að margir tengja mig enn við Fabrikkuna og Hlölla, og ég tek því sem hrósi. En vegna frétta dagsins af innsiglun Hamborgarafabrikkunnar á Höfðatorgi og Hlöllabáta á Bíldshöfða vil ég taka fram að ég hef hvorki átt hlut í né komið að rekstri Fabrikkunnar frá 2018, og ekki komið að eignarhaldi né rekstri Hlöllabáta frá árinu 2022,“ skrifar Sigmar.
Hann tekur jafnframt fram að lokun Minigarðsins tengist þessum málum ekki, þótt fréttir af öllum þremur fyrirtækjunum hafi borist í sömu vikunni.
„Það er tilviljun að þetta lendi allt í sömu vikunni, og ég hefði sjálfur ekki valið þessa tímasetningu,“ segir Sigmar.
Í lok færslunnar vísar hann í lögmál Murphys og segir í léttum tón að það hafi ekki tekið fram að allt gæti farið úrskeiðis í sömu vikunni.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir