Samgönguyfirvöld í Detroit í Bandaríkjunum hafa hafið athugun á óvenjulegu atviki þar sem tveir hestar voru leiddir um borð í strætisvagn. Atvikið náðist á myndband og hefur vakið talsverða athygli.
Atvikið átti sér stað síðastliðinn laugardag þegar strætisvagn stöðvaði við biðstöð á 7 Mile East, skammt frá Strasburg Street. Á myndbandinu sjást tveir einstaklingar leiða söðlaða hesta inn um fremri dyr vagnsins áður en þeir yfirgefa hann um afturhurðina nokkrum sekúndum síðar.
Samgönguyfirvöld hafa staðfest að málið sé til skoðunar. Í yfirlýsingu kemur fram að háttsemin samræmist ekki reglum og geti skapað óöryggi meðal farþega.
Jordan Williams, eigandi hestanna og meðlimur samtakanna Urban City Cowboys, sagði í samtali við WXYZ að hann hefði áður farið með hesta um borð í strætisvagna borgarinnar.
Williams sagðist hafa fengið leyfi vagnstjórans til að fara með dýrin inn í vagninn til að vekja athygli á svörtum kúrekum í Detroit.
Að hans sögn voru tveir eða þrír farþegar um borð og enginn slasaðist.
Samkvæmt reglum eru aðeins viðurkennd þjónustudýr heimil í strætisvögnum. Þau verða jafnframt að vera undir stjórn eigenda sinna og mega ekki taka sæti frá farþegum.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir