Fjölmiðlamaðurinn Illugi Jökulsson minnist tónlistarmannsins Megasar með hlýjum orðum í Facebook-færslu sem hann birti í morgun en útför listamannsins fór fram í Hallgrímskirkju í gær.
Illugi segir kveðjustundina hafa verið afar áhrifamikla og rifjar upp að kynni hans af Megasi hafi hafist með plötunni Millilending árið 1975.
„Enginn, bara alls enginn íslenskur listamaður hefur verið mér mikilvægari allt frá því ég kynntist honum fyrst á plötunni Millilendingu 1975,“ skrifar hann.
Hann segir að á þeirri plötu hafi þegar verið til staðar allt það sem einkenndi list Megasar.
„Húmorinn, leikurinn, hugkvæmnin og kvikindisskapurinn, orðkyngin, orðlistin, einlægnin, hæðnin, nístandi sorgin og lífsneistinn samt í söng silfurskottanna.“
Illugi segir margt hafa staðið upp úr við útförina en nefnir sérstaklega flutning Möggu Stínu á lögum Megasar.
„Ég hef lengi verið þeirrar skoðunar að eina manneskja sem syngur Megas betur en Megas er Magga Stína og það staðfestist þarna svo sannarlega,“ skrifar hann og hrósar sérstaklega túlkun hennar á Óþarflegri fundvísi Ingólfs Arnarsonar og laginu Björt ljós borgarljós.
Hann segir einnig flutning Passíusálmsins, með Ragnar Kjartansson fremstan í flokki, hafa verið ógleymanlegan.
„Þetta mun verða mér ógleymanlegt. Alltaf og alveg ógleymanlegt.“
Illugi segist gera sér grein fyrir því að útförin hafi verið erfið fyrir fjölskyldu og ástvini Megasar en sjálfur hafi hann upplifað hana á annan hátt.
„Þetta var eflaust erfið kveðjustund fyrir syni Magnúsar, aðra ástvini og afkomendur, og ekki síst hana Margréti, en sjálfur gladdist ég nú bara á einhvern hátt að hafa fengið að vera viðstaddur þegar hann ýtti úr vör.“
Athugasemdir