Leikarinn Pálmi Gestsson gagnrýnir harðlega þá sem bregðast við alvarlegum færslum á samfélagsmiðlum með hláturkörlum. Í nýrri Facebook-færslu segist hann eiga erfitt með að skilja hvers vegna fólk noti slíkt viðbragð við fréttum af hörmungum á borð við mannskæða gróðurelda.

Pálmi segir að hann hafi undanfarið velt þessum svokölluðu „flissurum“ fyrir sér.

„Þetta er ótrúlegur harmleikur. Og meirihluti þeirra sem bregðast við hlær, flissar. Það er háttur flissarana að þeir hafa ekkert að segja, koma ekki fram með neina skoðun, bara flisskall,“ skrifar hann.

Hann segir að sömu einstaklingarnir birtist gjarnan þegar hann setji fram skoðanir á Facebook og bregðist við með hláturkörlum þótt efnið sé ekki fyndið.

Til að kanna viðbrögðin segist Pálmi hafa gert litla tilraun. Hann fór inn á síður nokkurra þeirra sem notuðu hláturviðbrögð við færslum hans og setti sjálfur hláturkarl við færslur þeirra.

„Ég hef grun um að þeim hafi ekki fundist það fyndið og lái þeim hver sem vill,“ skrifar hann.

Pálmi segir að vissulega sé ekkert athugavert við að fólk sé hláturmilt, en hann hafi grun um að hláturviðbrögðin séu oft notuð til að gera lítið úr bæði umræðuefninu og þeim sem tjá sig.

Sem dæmi nefnir hann umræðuna um loftslagsbreytingar. Þar segir hann að þegar virtir vísindamenn leggi fram niðurstöður sínar bregðist sumir við með hláturkörlum í stað þess að færa rök fyrir máli sínu. Pálmi vísar þar í frétt á RÚV þar sem íslenskur vísindamaður segir loftslagsbreytingar helstu orsök vaxandi gróðurelda í heiminum.

„Þarna kemur sprenglærður, virtur og viðurkenndur vísindamaður með djúpstæða þekkingu á málefninu og segir okkur hvað er að gerast og þá koma Pétur og Páll og fullt af alls konar kjánum sem enginn veit deili á og hvað gera þeir? Jú, setja hláturkall og flissa eins og vísindamaðurinn sé hálfviti og þeir sjálfir hafi miklu meiri þekkingu á því sem er að gerast. Ótrúlegt alveg.“