Bandaríski leikarinn Vincent Pastore, sem var þekktastur fyrir hlutverk sitt sem mafíósinn Salvatore „Big Pussy“ Bonpensiero í HBO-þáttunum The Sopranos, er látinn, 80 ára að aldri.
Umboðsmenn hans, Robert Attermann og Bob McGowan, staðfestu andlátið við E! News. Ekki liggur enn fyrir dánarorsök en Pastore fannst látinn á heimili sínu í Bronx í New York. Talið er að hann hafi látist 31. júlí eða 1. ágúst.
„Ég hafði þann heiður að vera umboðsmaður Vinny í meira en 30 ár, löngu áður en The Sopranos gerði hann að landsþekktu nafni,“ sagði Attermann í yfirlýsingu.
„Fyrir umheiminn verður hann ávallt hinn ógleymanlegi „Big Pussy“, en fyrir okkur sem þekktum hann var hann svo miklu meira.“
Attermann lýsti Pastore sem einum hlýjasta og örlátasta manni sem hann hefði kynnst og sagði hann ávallt hafa tekið sér tíma til að hitta aðdáendur, skrifa eiginhandaráritanir og stilla sér upp fyrir myndir.
Bob McGowan sagði tíðindin vera „áfall“ og kvaðst afar sorgmæddur vegna andlátsins.
Á nærri fjögurra áratuga leikferli varð Pastore þekktur fyrir hlutverk ítalsk-amerískra mafíósa í kvikmyndum og sjónvarpi. Hann lék meðal annars í myndunum Goodfellas (1990), Carlito's Way (1993) og Gotti (1996).
Það var þó árið 1999 sem hann sló í gegn í hlutverki „Big Pussy“ í The Sopranos. Persóna hans var náinn samstarfsmaður mafíuforingjans Tony Soprano, sem James Gandolfini lék, en síðar kom í ljós að hann hafði orðið uppljóstrari fyrir lögregluna. Örlög hans í lokaþætti annarrar þáttaraðar árið 2000 eru talin ein eftirminnilegasta sena í sögu þáttanna.
Pastore lætur eftir sig dótturina Renee Pastore, sem hann átti með fyrrverandi eiginkonu sinni, Nancy Berke.
Attermann sagði að lokum að Pastore hefði elskað leiklistina og lagt sig fram um að styðja unga leikara.
„Hann skilur eftir sig arfleifð sem nær langt út fyrir eftirminnileg hlutverk hans. Hans verður sárt saknað og hans verður ávallt minnst.“
