Sex aðilar gista fangageymslu lögreglunnar á höfuðborgarsvæðinu þegar þetta er skrifað en alls voru 63 mál bókuð í kerfum hennar frá 17:00 í gær til 05:00 í morgun. Hér má sjá helstu verkefni lögreglunnar.

Lögreglan sem starfar í Austur og Vesturbæ Reykjavíkur, miðborginni og á Seltjarnarnesi handtók aðila vegna líkamsárásar og var hann vistaður í fangaklefa.

Sama lögreglan handtók aðila fyrir brot á lögreglusamþykkt. Var hann fluttur á lögreglustöðina við Hlemm og málð afgreitt þar.

Þá var ökumaður stöðvaður eftir að hann kítlaði pinnann aðeins of mikið en hann náðist á 115 km/klst þar sem hámarks hraði er 80 km/klst. Málið var afgreitt á vettvangi.

Tveir aðrir ökumenn voru stöðvaðir við akstur og reyndust þeir báðir undir áhrifum ávana- og fíkniefna.

Lögreglan sem annast útköll í Hafnarfirði, Garðabæ og á Álftanesi stöðvaði ökumann sem reyndist undir áhrifum ávana- og fíkniefna.

Sama lögregla fékk tilkynningu um líkamsárás og er málið í rannsókn.

Kópavogs og Breiðholtslögreglunni barst einnig tilkynning um líkamsárás og var aðili handtekinn á vettvangi og var honum stungið í steininn.

Enn ein líkamsárásin var tilkynnt en í þetta sinn var það á svæði lögreglunnar sem vinnur í Grafarvogi, Mosfellsbæ og Árbæ. Var aðili handtekinn á vettvangi og vistaður í fangaklefa.