Fimm einstaklingar voru handteknir á Akureyri síðdegis í gær eftir að lögreglu barst tilkynning um grun um vopnaburð.

Lögreglan stöðvaði tvo bíla og fann skotvopn í báðum þeirra. Hinir handteknu voru fluttir í fangaklefa. Sérsveit ríkislögreglustjóra aðstoðaði við aðgerðina en engin slys urðu á fólki.

Þetta staðfestir Hjalti Bergmar Axelsson, aðstoðaryfirlögregluþjónn hjá lögreglunni á Norðurlandi eystra við fréttastofu RÚV.

Aðspurður segir Hjalti að ekki liggi fyrir hvort málið tengist annarri lögregluaðgerð á Akureyri í gær, þegar karlmaður á þrítugsaldri var handtekinn með hníf á sér. Níu voru handteknir í þeirri aðgerð en átta þeirra var sleppt á vettvangi.

Hann telur þó ólíklegt að tengsl séu á milli málanna.