Mannlíf sagði frá Facebook-færslu fyrrverandi ritstjórans og núverandi leiðsögumannsins Reynis Traustasonar, þar sem hann bendir á sprungið og úr sér gengið öryggisgler á útsýnispallinum á Bolafjalli við Bolungarvík. Sagði hann ferðamenn furða sig á ástandinu á pallinum og benti á að um 670 metra fall sé frá pallinum. Fyrrverandi bæjarstjóri Bolungarvíkur svaraði færslu Reynis í athugasemdum.
Jón Páll Hreinsson segir í athugasemd við færslu Reynis að öryggisglerið sé öruggt, þrátt fyrir útlitið og bendir á að ekki kosti að fara á pallinn en það kosti að nota bílastæðið. Segir hann það ósanngjarnt ef íbúar Bolungarvíkur ættu að standa einir undir kostnaðinum á viðhaldi pallsins.
„Þessi gler (sérstök öryggisgler) eru fullkomlega örugg, þrátt fyrir að líta svona út. Hönnun pallsins, smíði hans og uppsetning fylgdi ströngustu öryggiskröfum og hann hefur staðist allar öryggisúttektir síðan. Það er hinsvegar skiljanlegt að fólki finnist það óþægilegt að sjá þetta svona, þótt það sé ekki hættulegt. Þess vegna er girðingin þarna. Svo kostar ekki á pallinn. Það kostar að nota bílastæðið. Mjög hóflegt gjald til að standa undir fjárfestingu við bílastæðið, enda væri það ósanngjarnt að ætlast til að íbúar Bolungarvíkur stæðu einir undir þeim kostnaði.“
Reynir svaraði bæjarstjóranum fyrrverandi um hæl og sagði þetta ekki í lagi.
Því svaraði Jón Páll:
„Það getur vel verið. Ég var bara að benda á að hann væri ekki hættulegur og það kostaði ekki inná hann. En með því að fleiri góðir leiðsögumenn eins og þú venji komur sýnar á pallinn, þá verður auðveldara fyrir sveitarfélagið að bæta upplifun gesta.“
Athugasemdir bæjarstjórans fyrrverandi sköpuðu nokkra umræðu en Árni Tryggvason spyr hann hvers vegna það væri ósanngjarn ef Bolvíkingar kosti framkvæmdirnar.
„Hvers vegna er það ósanngjarnt að íbúar kosti framkvæmdir í sínu sveitarfélagi?
Sérstaklega ef frumkvæðið er þeirra.“
Steinar Örn Stefánsson spyr Jón Pál hvort ríkið hafi ekki fjármagnað meginhluta verkefnisins.
„Var ekki meginhluti verkefnisins þar með talið bílastæðið fjármagnað með styrk frá ríkinu/framkvæmdasjóði ferðamannastaða?“
Þegar þetta er ritað hefur Jón Páll ekki svarað þessum spurningum.
