Á morgun, fimmtudaginn 17. september kl. 09:30, verður haldið fjölmennt ungmennaþing í Fjölbrautaskóla Norðurlands vestra. Öllum nemendum í 10. bekk frá öllum sex grunnskólum á svæðinu er boðið að taka þátt.
Sjónum verður beint að mjög mikilvægu og alvarlegu málefni: ofbeldi í nánum samböndum unglinga.
Þingið er samstarfsverkefni Barnaheilla, SSNV, Farsældarráðs Norðurlands vestra, Öruggara Norðurland vestra og Forvarnaráætlunar Norðurlands vestra.
Verkefnið er byggt á vinnustofum sem Barnaheill héldu víða um land á vormánuðum en hefur verið sérsniðið að aðstæðum á svæðinu.
Góður stuðningur er við bakið á framtakinu en þingið er styrkt af Kaupfélagi Skagfirðinga, FISK seafood, Steinull, Borealis datacenter, Byggðarstofnun, N1 á Sauðárkróki og Kjörbúðinni á Blönduósi.
Ofbeldi þrífst í þögninni
Fyrirliggjandi gögn sýna að kynferðisofbeldi gegn ungu fólki og meðal ungmenna er alvarlegt samfélagslegt vandamál. Ljóst er að þörf er á aukinni umræðu og markvissri fræðslu um mörk, samþykki, virðingu og heilbrigð samskipti.
Með beinni þátttöku unga fólksins á svæðinu á að fá innsýn í upplifun þeirra og viðhorf. Markmiðið er meðal annars að kanna:
- Hvort ungmennin þekki einkenni óheilbrigðra sambanda og ofbeldis.
- Hvort þau viti hvert skuli leita eftir aðstoð.
- Hvaða mögulegu lausnir þau sjá sjálf til að minnka slíkt ofbeldi.
Niðurstöðurnar nýttar í forvarnarstarf
Þátttaka í ungmennaþingi veitir dýrmætt tækifæri fyrir ungt fólk til að tjá skoðanir sínar og væntingar. Raddir þeirra eru lykilþáttur í því að móta fræðslu og forvarnir sem raunverulega ná til ungs fólks og mæta þörfum þess.
Að þinginu loknu munu Barnaheill taka saman upplýsingar og niðurstöður. Farsældarráðið, Öruggara Norðurland vestra og ForNor munu í kjölfarið nýta þá vinnu til að byggja upp betra forvarnarstarf og móta viðbrögð við ofbeldi í lífi ungmenna á Norðurlandi vestra.
Áhugasamir geta kynnt sér niðurstöður frá sambærilegum þingum sem haldin voru í öðrum landshlutum fyrri hluta árs í skýrslu Barnaheilla.
