Linda Pétursdóttir deildi einlægri og hvetjandi sögu á samfélagsmiðlasíðu sinni. Þar lýsir hún því hvernig hún sigraðist á alvarlegum veikindum og hvernig hugarfarsbreyting og seigla hjálpuðu henni að snúa lífi sínu við.

Árið 2010 stóð Linda frammi fyrir einni stærstu áskorun lífs síns þegar hún veiktist alvarlega af liðagigt. Á þeim tíma var hún einstæð móðir með fjögurra ára gamla dóttur og átti oft í erfiðleikum með að sinna einföldustu hlutum.

„Suma daga var ég svo verkjuð og bólgin að ég gat ekki sinnt sjálfri mér, hvað þá hjálpað henni með allt það sem ég var vön að gera fyrir hana daglega,“ segir Linda í færslunni og bætir við að dóttir hennar hafi stundum þurft að hjálpa henni að matast. „Þetta voru mjög erfiðir tímar. Ég fór reglulega í lyfjagjafir og vissi ekki hvernig framhaldið yrði.“

Seiglan tvíefldist við móðurhlutverkið

Linda útskýrir að sem einstæð móðir hafi hún fljótt áttað sig á því að hún yrði að gera allt sem í hennar valdi stóð til að breyta stöðunni. Hún segist alltaf hafa haft mikinn áhuga á sjálfsvinnu og að hún sé gædd mikilli seiglu, en sú seigla hafi „tvíeflst“ þegar hún varð móðir. Hún hóf að rannsaka hvað hún gæti sjálf gert til að bæta heilsu sína, breytti hugsunarhætti sínum og tók upp hollara mataræði ásamt nýjum og heilbrigðum lífsstílsvenjum sem hún fylgir enn þann dag í dag.

„Með hverju árinu hefur áherslan á heilsuna aukist og í dag er það mér jafn mikilvægt að efla mig líkamlega og andlega,“ segir hún.

Erfitt að trúa breytingunni

Þegar Linda horfir til baka á myndir frá árinu 2010 segir hún erfitt að trúa því að um sömu manneskjuna sé að ræða, en sextán ár eru liðin síðan hún stóð í ströngustu baráttunni. Hún bendir á að fólk eigi það til að horfa á núverandi stöðu sína og nota hana sem mælikvarða á það hvað sé mögulegt í framtíðinni.

„En staðan þín í dag er ekki framtíðin þín. Tímabundnir erfiðleikar þurfa ekki að ákvarða hvað verður mögulegt fyrir þig síðar,“ skrifar Linda.

Linda notar eigin reynslu til að hvetja og styðja aðra sem ganga í gegnum erfiðleika. Hún boðar til ókeypis örnámskeiðs undir heitinu Nýir möguleikar, þar sem hún ætlar að aðstoða fólk við að sjá lengra en núverandi aðstæður og opna á ný tækifæri í lífinu.