Heilbrigðiseftirlitið hefur staðfest að mikið magn úrgangs hafi verið urðað í hljóðmönum á íþróttasvæði Skotíþróttafélags Hafnarfjarðar. Heimildin greindi fyrst frá málinu í apríl en eftirlitsskýrslu um málið hefur nú verið skilað.

Starfsmenn heilbrigðiseftirlitsins grófu í manirnar með gröfu við skoðun á svæðinu. Þar komu meðal annars í ljós byggingarúrgangur, rörbútar, timbur, hellubrot, kaplar, bíldekk og annar úrgangur sem ekki má urða með þessum hætti.

Við eftirlitið komu einnig í ljós merki um að úrgangur hefði verið brenndur á lóð félagsins. Tunna og kamína báru þess merki en engar ruslatunnur fundust á svæðinu.

Kristinn Valgeir Sveinsson, formaður félagsins, sagði við Heimildina í apríl að honum væri ekki kunnugt um ólöglega urðun og sagði galið að urða byggingarúrgang á svæðinu.

Heilbrigðiseftirlitið hefur nú óskað eftir aðkomu Umhverfis- og orkustofnunar vegna urðunarinnar.