Varnarmálaráðherra Ísraels, Israel Katz, segir aðeins tímaspursmál hvenær Ísrael hefji á ný umfangsmikinn hernað á Gaza. Hann segir ísraelska herinn reiðubúinn til að „ljúka verkinu“ gegn Hamas og hrinda í kjölfarið í framkvæmd áætlun um brottflutning Palestínumanna frá Gaza.
Katz lét ummælin falla á miðvikudag þegar hann svaraði gagnrýni frá öðrum frambjóðanda á hægri væng stjórnmálanna fyrir þingkosningarnar í Ísrael 27. október.
Varnarmálaráðherrann fullyrti að um 70 prósent Gaza hefðu þegar verið tæmd af íbúum sínum í hernaðaraðgerðum Ísraels frá árás Hamas á Ísrael 7. október 2023. Nær allir íbúar Gaza hafa þurft að yfirgefa heimili sín einhvern tíma frá upphafi stríðsins og stórir hlutar svæðisins eru í rúst.
Katz sagði vopnahléið, sem Donald Trump Bandaríkjaforseti tilkynnti í október 2025, hafa haft mikið gildi fyrir Ísrael. Það hefði meðal annars leitt til heimkomu þeirra gísla sem eftir voru og tryggt skuldbindingu Bandaríkjanna um afvopnun Hamas.
Hann sagðist hins vegar ekki telja að Hamas yrði afvopnað með þeim hætti sem gert hefði verið ráð fyrir.
„Við skiljum öll að þetta mun ekki gerast,“ sagði Katz og bætti við að ísraelski herinn væri tilbúinn, fengi hann fyrirmæli um það, að útrýma Hamas og „ljúka verkinu“ svo hægt yrði að hrinda svokallaðri fólksflutningaáætlun í framkvæmd.
Katz sagði fyrr í september að Ísrael væri reiðubúið að auðvelda brottför Palestínumanna frá Gaza og hélt því fram að meirihluti íbúanna vildi flytja þaðan. Bandaríski sendiherrann í Ísrael, Mike Huckabee, hefur hins vegar hafnað því að til standi að flytja íbúa Gaza á brott gegn vilja þeirra. Utanríkisráðherra Ísraels, Gideon Saar, sagði jafnframt 9. september að ríkisstjórnin hefði engin áform um að vísa Palestínumönnum frá Gaza.
Árás Hamas og annarra vígasamtaka 7. október 2023 kostaði 1.221 mann lífið samkvæmt samantekt AFP sem byggir á opinberum ísraelskum tölum. Þá voru 251 teknir í gíslingu.
Í hernaðaraðgerðum Ísraels á Gaza síðan þá hafa meira en 73.700 Palestínumenn látið lífið samkvæmt heilbrigðisráðuneytinu á Gaza. Ráðuneytið greinir ekki á milli almennra borgara og vígamanna í heildartölum sínum. Þrátt fyrir vopnahléið hafa árásir haldið áfram og samkvæmt ráðuneytinu hafa 1.375 Palestínumenn verið drepnir frá því það tók gildi.
Hamas lýsti því yfir í lok júlí að samtökin væru reiðubúin til afvopnunar. Benjamin Netanyahu, forsætisráðherra Ísraels, hefur hins vegar hafnað næsta áfanga samkomulagsins og sagt að ísraelskur herafli verði ekki kallaður frá Gaza fyrr en staðfest hafi verið að Hamas hafi látið öll vopn af hendi.
