Össur Skarphéðinsson, fyrrverandi utanríkisráðherra og þingmaður, gagnrýnir Karl Gauta Hjaltason, þingmann Miðflokksins, harðlega eftir að sá síðarnefndi kallaði eftir afsögn Þorgerðar Katrínar Gunnarsdóttur utanríkisráðherra í ræðustól Alþingis í gær.
Karl Gauti lét ummælin falla undir dagskrárliðnum störf þingsins. Sagði hann Þorgerði Katrínu hafa tekið forystu í Evrópumálum ríkisstjórnarinnar og sakaði hana um að hafa gengið fram af offorsi. Þá hélt hann því fram að hún hefði „rýrt sig að áliti og trausti bæði í Brussel og Washington“.
„Hæstv. utanríkisráðherra á ekkert erindi lengur í sínu embætti og henni væri sæmst að segja sig frá því þegar í stað,“ sagði Karl Gauti.
Ummælin féllu í kjölfar þjóðaratkvæðagreiðslu um framhald aðildarviðræðna Íslands við Evrópusambandið. Kristrún Frostadóttir forsætisráðherra hefur sagt að ríkisstjórnin muni virða niðurstöðu atkvæðagreiðslunnar og ekki halda aðildarviðræðum áfram á þessu kjörtímabili. Jafnframt hefur hún sagt að umsókn Íslands verði ekki formlega dregin til baka.
Össur ósáttur
Össur gerir að umtalsefni að Þorgerður Katrín hafi ekki verið viðstödd þegar Karl Gauti flutti ræðuna og segir atlöguna hafa verið „ódrengilega og lítilmannlega“.
„Það er fáheyrt ef ekki einsdæmi að þingmenn veitist harkalega og persónulega að öðrum þingmönnum eða ráðherra án þess að gera viðkomandi viðvart svo koma megi vörnum við. Hvað þá ef sett er fram krafa um afsögn!“ skrifar Össur á Facebook.
Hann rifjar jafnframt upp ummæli Þráins Bertelssonar, fyrrverandi þingmanns, um dagskrárliðinn störf þingsins og vísar til þess að Þráinn hafi kallað liðinn „hálftíma fyrir hálfvita“.
Össur vísar einnig til ummæla Steingríms J. Sigfússonar, fyrrverandi ráðherra og forseta Alþingis, sem hann segir eitt sinn hafa notað orðin „gunga“ og „drusla“ um ráðherra sem neitaði að standa fyrir máli sínu.
„Hvaða orð má nota um þingmann sem þorir ekki að standa andspænis ráðherra þegar hann heimtar höfuð hennar?“ spyr Össur.
Hann skorar jafnframt á þingmenn Miðflokksins að fylgja gagnrýni Karls Gauta eftir með formlegri vantrauststillögu á utanríkisráðherra.
„Karl Gauti er hins vegar ekki byssa sem skýtur nema henni sé miðað. Þingmenn Miðflokksins hljóta því að fylgja eftir aðför sinni að Þorgerði Katrínu með því að leggja fram formlega tillögu um vantraust á utanríkisráðherrann. Eða leggja þeir ekki í það?“
Össur lýkur færslunni á beittri spurningu:
„Getur verið að þeir séu gungur sem þora bara að skjóta úr launsátri?“
Ræða Karls Gauta í heild sinni
Frú forseti. Fyrir rétt um hálfum mánuði efndi ríkisstjórnin til þjóðaratkvæðagreiðslu um afstöðu þjóðarinnar til Evrópusambandsins. Fyrir kosningarnar var það helsta viðkvæði stjórnarliða að segjast treysta þjóðinni. Treysta þjóðinni. Atkvæðagreiðslunni var reyndar hrundið af stað þrátt fyrir að einn stjórnarflokkanna hefði ítrekað lýst andstöðu sinni við aðild að Evrópusambandinu og margsinnis lagt fram tillögu um brottfall umsóknar ríkisstjórnar Jóhönnu Sigurðardóttur. Hæstv. utanríkisráðherra tók alla stjórn í þessu máli og gekk þar í fylkingarbrjósti af hálfu ríkisstjórnarinnar. Hæstv. forsætisráðherra sparaði sig mjög í umræðum í aðdraganda atkvæðagreiðslunnar. Hún tók enga forystu í málinu, enga, og ekki heldur eftir atkvæðagreiðsluna. Hana lét hún utanríkisráðherranum eftir sem gekk fram af offorsi og hefur rýrt sig að áliti og trausti bæði í Brussel og Washington. Hæstv. utanríkisráðherra á ekkert erindi lengur í sínu embætti og henni væri sæmst að segja sig frá því þegar í stað.
Hlustaði ríkisstjórnin á þjóðina þegar allt kom til alls? Hlustaði hún? Nei, það voru orðin tóm. Þau hafa reyndar haldið fyrir bæði eyru í hálfan mánuð. Þrátt fyrir að þjóðin hafi alfarið hafnað Evrópuvegferð ríkisstjórnarinnar streitist hún á móti því að draga umsóknina til baka. Þar hefur hæstv. forsætisráðherra einnig eftirlátið forystuna til formanns Viðreisnar í stað þess að gera hið augljósa: Fara eftir skýrri niðurstöðu atkvæðagreiðslunnar. Hyggst ríkisstjórnin, undir forystu utanríkisráðherra Viðreisnar, hefna sín á þjóðinni með því að gera Evrópureglur rétthærri í íslenskum lögum?
