Brynhildur Bolladóttir hefur verið ráðin aðstoðarmaður framkvæmdastjóra Rauða krossins á Íslandi. Hún var valin úr hópi 77 umsækjenda um starfið.

Brynhildur lauk meistaragráðu í lögfræði frá Háskóla Íslands árið 2014 og þekkir vel til starfsemi Rauða krossins. Hún starfaði sem upplýsingafulltrúi félagsins á árunum 2016 til 2022.

Frá árinu 2023 og fram á þetta ár starfaði Brynhildur sem sérfræðingur hjá landskjörstjórn. Þar kom hún meðal annars að gerð reglugerða og leiðbeininga vegna kosninga, hafði umsjón með upplýsingavefnum kosning.is og vann að stafvæðingu kosningaferla.

Í nýju starfi mun Brynhildur gegna lykilhlutverki í stjórnsýslu Rauða krossins og vinna náið með framkvæmdastjóra, stjórnendum og stjórn félagsins.

Ingibjörg Halldórsdóttir, framkvæmdastjóri Rauða krossins á Íslandi, segir félagið afar lánsamt að fá Brynhildi aftur til starfa og segir hana búa yfir bæði mikilvægri sérfræðiþekkingu og dýrmætri innsýn í starfsemi félagsins.