Héraðsdómur Vesturlands hefur sýknað Klumbu ehf. af kröfum tveggja nígerískra félaga sem námu samanlagt tæplega 39 milljónum króna. Málin tengdust viðskiptum með þurrkaðar fiskafurðir til Nígeríu. Báðir dómar voru kveðnir upp 14. september.
Í öðru málinu krafðist Imma Joe Global Resources Ltd. þess að Klumba greiddi félaginu 10.136.775 krónur auk dráttarvaxta og málskostnaðar. Krafan skiptist í 50 þúsund Bandaríkjadali vegna gallaðrar vörusendingar og 32.500 dali vegna meintrar bónusgreiðslu.
Klumba hafnaði kröfunum og benti meðal annars á að viðskiptin hefðu farið í gegnum íslenska félagið Svalþúfu ehf. Dómurinn taldi gögn málsins styðja að Svalþúfa hefði gegnt umfangsmiklu hlutverki í viðskiptunum og ekki þótti sannað að Imma Joe Global Resources ætti beina kröfu á Klumbu.
Klumba var því sýknuð af öllum kröfum félagsins og Imma Joe Global Resources gert að greiða eina milljón króna í málskostnað.
Í hinu málinu krafðist Rosebeth Obiesika & Co. 28.601.360 króna greiðslu frá Klumbu auk vaxta og málskostnaðar. Félagið taldi sig eiga 224.306 Bandaríkjadala kröfu vegna innborgana í tengslum við skreiðarviðskipti.
Stefnandi hélt því fram að Klumba hefði tekið við greiðslum án þess að afhenda umsamið magn afurða. Dómurinn taldi hins vegar ósannað að Klumba hefði beitt svikum eða blekkingum. Þá næði viðskiptayfirlit, sem krafan byggðist á, til margra viðskiptamanna og uppruni hluta greiðslnanna væri óljós.
Klumba var sýknuð að svo stöddu í málinu þar sem endanlegt uppgjör viðskipta hefði ekki farið fram. Rosebeth Obiesika & Co. var gert að greiða Klumbu 1,2 milljónir króna í málskostnað.
Samanlagt var því Klumba sýknuð af kröfum upp á 38,7 milljónir króna í málunum tveimur.
