Mikil aðsókn og ánægja hefur verið með morgunstundirnar „Júlí vellíðan“ sem haldnar hafa verið á föstudagsmorgnum í Systrasamlaginu við Óðinsgötu. Viðburðirnir eru samstarfsverkefni þeirra Eddu Björgvinsdóttur leikkonu og Thelmu Bjarkar fatahönnuðar, en þær leiða þar saman stólajóga, hugleiðslu og fræðslu.
Bæði Edda og Thelma eru lærðir jógakennarar og hafa jafnframt lokið námi í jákvæðri sálfræði. Þær nýta þá þekkingu til að skapa vettvang þar sem áhersla er lögð á slökun, hreyfingu og andlega rækt. Tímarnir hafa farið fram á milli klukkan 10:00 og 11:00, ýmist innandyra eða undir berum himni eftir því sem veður hefur leyft.
Aðgangur að morgunstundunum hefur verið ókeypis og opinn öllum á meðan húsrúm leyfir. Mikil stemning hefur skapast í kringum verkefnið og ljóst er að þörf er á vellíðunarstundum sem þessum í miðborginni.
