Járnvír fannst í grænum aspas frá Euro Shopper, sem kona nokkur í Reykjavík ætlaði sér að borða í gærkvöldi.

Kona nokkur hafði samband við Mannlíf í gærkvöldi og sagði farir sínar ekki sléttar og vildi vara aðra við. Hún hafði keypt grænan aspas frá Euro Shopper og ætlaði sér að borða hann sem meðlæti í kvöldmatinn. Hún snarhætti hins vegar við það þegar hún fann aðskotahlut í honum.

„Ég var að borða áðan og hafði soðið aspas til að hafa með kryddlegnum kjötsneiðum og tók eftir hvað aspasinn var grjótharður stundum og mjór og ræfilslegur og sem betur fer rak ég augun í þetta stykki, annaðhvort hart plast eða stál eða eitthvað sem er í raun flækt í einn aspasbitann. Veit ekki hvernig hefði farið með meltingarveginn ef ég hefði gleypt þetta ...“, segir konan í skriflegu svari til Mannlífs.

Aðspurð hvar hún hefði keypt aspasinn sagðist hún ekki almennilega muna það en Euro Shopper vörur er seldar í fjölda verslana.

„Það skiptir ekki máli heldur að vara fólk við ef það kaupir svona; tók sem sé fyrst eftir hvað þessir bitar eru harðir sumir og örmjóir ... og svo sá ég þetta plastdrasl eða rör eða hvað þetta er.“

Eftir að konan hafði rannsakað aðskotahlutinn betur sagði hún að um einhvernskonar járn væri að ræða. Bætti hún svo við:

„Ég væri án efa á skurðarborðinu ef ég hefði gleypt þetta.“

Konan ætlar að tilkynna þetta til MAST, til að tryggja að aðrir lendi ekki í því sama.