Leikarinn Nicholas Brendon, sem var hvað þekktastur fyrir hlutverk sitt sem Xander Harris í sjónvarpsþáttunum Buffy the Vampire Slayer á árunum 1997 til 2003, er látinn, 54 ára að aldri.

Brendon lést í svefni í gær, föstudaginn 20. mars af náttúrulegum orsökum, að því er fjölskylda hans staðfesti í tilkynningu á Facebook-síðu hans.

„Við erum miður okkar yfir því að tilkynna andlát bróður okkar og sonar, Nicholas Brendon. Hann lést í svefni af náttúrulegum orsökum,“ sagði í yfirlýsingunni. „Fjölskyldan biður um næði á þessum tíma á meðan við syrgjum missinn og minnumst manns sem lifði með ákefð, ímyndunarafli og hjarta.“

Brendon fæddist í Los Angeles í Kaliforníu og öðlaðist frægð á tíunda áratugnum fyrir hlutverk sitt í Buffy the Vampire Slayer, þar sem hann lék í nær öllum 144 þáttum þáttaraðarinnar.

Hann kom einnig fram í þáttunum Criminal Minds þar sem hann lék Kevin Lynch á árunum 2007 til 2014.

Fjölskylda hans sagði jafnframt að þótt flestir þekktu hann fyrir leiklistina hefði hann á síðustu árum fundið nýja ástríðu í myndlist.

„Á síðustu árum fann Nicky mikla ástríðu í málun og listsköpun. Hann elskaði að deila þeim hæfileika sínum með fjölskyldu, vinum og aðdáendum. Hann var ástríðufullur, viðkvæmur og óþreytandi í sköpun sinni. Þeir sem þekktu hann best vissu að listin var ein hreinasta spegilmynd hans,“ sagði í yfirlýsingunni.

Þar kom einnig fram að Brendon hefði átt við erfiðleika að stríða á lífsleiðinni en hafi verið í meðferð og bjartsýnn á framtíðina þegar hann lést.

Áður en hann sló í gegn í Buffy the Vampire Slayer hafði hann einnig komið fram í vinsælum þáttum á borð við Dave’s World og Married… With Children.