Glæsilegt 205,8 fermetra einbýlishús við Vættaborgir 23 í Borgarhverfi Grafarvogs hefur verið sett á sölu á 184,9 milljónir króna. Húsið var byggt árið 2000 og stendur á eftirsóttum útsýnisstað með fallegu útsýni til norðurs.

Húsið er á þremur pöllum og býður upp á fjögur svefnherbergi og tvö baðherbergi. Innra skipulag er sagt sérlega skemmtilegt, en gengið er inn í aflokað anddyri með innangengi í 28,8 fermetra bílskúr.

Stofa og borðstofa eru rúmgóðar með mikilli lofthæð og stórum gluggum sem gefa gott birtuflæði. Að sunnanverðu er fallegur garður með pöllum, skjólgirðingum og gróðri, auk heits potts og áhaldaskúrs. Fyrir framan húsið er hellulagt plan með góðum bílastæðum og snjóbræðslukerfi.

Staðsetning eignarinnar þykir afar fjölskylduvæn, en húsið stendur rétt fyrir neðan Borgarskóla og leikskólann Hulduheima. Þá er stutt í verslun og þjónustu í Spönginni.