Glímumaðurinn Sabu, sannkölluð goðsögn í heimi atvinnuglímunnar, er látinn, aðeins þremur vikum eftir að hann tók þátt í sinni síðustu glímu. Þetta kemur fram í tilkynningu frá glímuteyminu All Elite Wrestling (AEW), þar sem þakklæti er lýst fyrir „ógleymanlegar háhættu sýningar“ og segir að hann hafi gefið allt sem hann átti fyrir glímuna.

AEW vottaði fjölskyldu og vinum hans samúð sína, en ekki hefur verið tilkynnt um dánarorsök.

Sabu, sem hét réttu nafni Terry Brunk, hóf glímuferil sinn á miðjum níunda áratugnum, aðeins rúmlega tvítugur. Hann lærði glímu hjá frænda sínum, Edward „The Sheik“ Farhat, og fékk sitt stóra tækifæri árið 1991 í Frontier Martial-Arts Wrestling. Þar hlaut hann ör á handleggjum og bol sem urðu fljótt hluti af ímynd hans.

Upphaflega töldu sumir örin vera sjálfssköpuð, en félagar hans í glímunni höfnuðu því og sögðu þau vera afleiðing harðvítugra bardaga.

Á ferli sínum kom Sabu fram í Extreme Championship Wrestling (ECW), World Championship Wrestling (WCW) og síðar WWE á árunum 2006 til 2007.

Hann glímdi þó enn af og til undir það síðasta, og síðasta viðureign hans fór fram þann 18. apríl á þessu ári, aðeins nokkrum vikum fyrir andlátið.

Á árunum 2010 til 2021 var Sabu í sambandi við glímukonuna Melissu Coates, sem lést af völdum fylgikvilla vegna COVID-19 árið 2021, 52 ára að aldri.

Sabu var 60 ára.