Manneskja ársins hjá Mannlífi er hinn tólf ára Hafþór Freyr Jóhannsson en hann hlaut 28 prósent atkvæða lesenda miðilsins. Í öðru og þriðja sæti kosningarinnar voru stjórnmálamennirnir Kristrún Frostadóttir og Snorri Másson, með 20 prósent atkvæða.

Hafþór Freyr breyttist á árinu úr venjulegum dreng á Norðfirði yfir í ofurhetju þegar hann gerði sig lítið fyrir og bjargaði lífi tveggja ára systur sinnar. Systirin, Snæbjörg Lóa, hafði fallið í sjóinn af bryggju í Neskaupsstað um Verslunarmannahelgina en Hafþór Freyr kastaði sér í sjóinn á eftir systur sinni og bjargaði lífi hennar. Hafði hann nýverið lokið skyndihjálparnámskeiði sem greinilega skipti sköpum.

Mannlíf ræddi við móður Hafþórs Freys, Lindu Maríu Emilsdóttur um nýjasta titil sonarins, Manneskja ársins en hún er auðvitað afar stolt af honum.

„Hann er bara brattur,“ segir Linda aðspurð hvernig Hafþór Freyr hafi það. „Hann er nú samt almennt ekkert fyrir athyglina. En hann er samt mjög stoltur af þessu,“ bætti hún við brosandi.

Linda segir að Norðfirðingar hafi allir orðið „mjög montnir af honum“ þegar hann fór að koma til greina sem maður eða manneskja ársins í fjölmiðlum.

Hafþór Freyr er elstu í fjögurra systkina hópi en hann á þrjár yngri systur.

„Þær líta allar mjög upp til hans og hann er rosalega duglegur að passa upp á þær,“ segir Linda í samtali við Mannlíf.

En hvernig strákur er Hafþór Freyr?

„Hann er ljúfur strákur og yfirvegaður og mjög þolinmóður,“ segir Linda og tekur undir blaðamanni að hann sé einnig afar hugrakkur.